جنگ نہیں، مذاکرات ہی پاک افغان مسئلے کا مستقل حل ہے؛ انوار الحق کاکڑ

دوحہ فورم کے موقع پر افغانستان اور پاکستان کے درمیان حالیہ تناؤ کے حوالے سے گفتگو کرتے ہوئے پاکستان کے سابق نگران وزیرِ اعظم انوارالحق کاکڑ نے کہا ہے کہ جنگ کسی بھی فریق کے مفاد میں نہیں ہوتی اور تمام مسائل کا حل بات چیت اور سفارتکاری میں ہے۔ انہوں نے یہ بات افغان میڈیا ادارے طلوع نیوز سے گفتگو کے دوران کہی۔

انوارالحق کاکڑ کا کہنا تھا کہ دونوں ممالک کے درمیان روابط اور تعاون کا تسلسل علاقائی استحکام کے لیے ناگزیر ہے۔ ان کے مطابق کشیدگی بڑھانے کے بجائے مشترکہ چیلنجز پر مل کر کام کرنا ہی آگے بڑھنے کا واحد راستہ ہے۔

انہوں نے زور دیا کہ پاکستان اور افغانستان ہمسایہ ہونے کے ساتھ ساتھ مذہبی، تاریخی اور سماجی طور پر بھی ایک دوسرے سے جڑے ہوئے ہیں، اس لیے اختلافات کو مذاکرات کے ذریعے حل کیا جانا چاہیے تاکہ امن اور خوشحالی کی راہیں کھل سکیں۔

دیکھیں: افغان طالبان نے ’’پیکی بلائنڈرز‘‘ کا اسٹائل اپنانے والوں کو گرفتار کرلیا