سخیبر پختونخوا کے قبائلی ضلع کرم میں سکیورٹی فورسز نے دہشت گردوں کے خلاف کارروائی کرتے ہوئے تین عسکریت پسندوں کو ہلاک کر دیا۔ تفصیلات کے مطابق کرم ایجنسی میں علی الصبح سکیورٹی فورسز نے دہشتگردوں کی موجودگی کی اطلاع پر انٹیلیجنس بیسڈ آپریشن کیا۔ آپریشن کے دوران فورسز اور دہشتگردوں کے درمیان شدید فائرنگ کا تبادلہ ہوا۔
تاہم سکیورٹی فورسز کی مؤثر اور بروقت کارروائی کے نتیجے میں تین دہشتگرد ہلاک کر دیے گئے۔ شدید موسمی حالات، ریکارڈ توڑ برف باری کے باوجود فورسز کے جوانوں نے بھرپور پیشہ ورانہ مہارت اور بلند حوصلے کا مظاہرہ کیا۔
ذرائع کے مطابق پاک فوج قومی سلامتی کو درپیش کسی بھی خطرے سے نمٹنے کے لیے مکمل الرٹ ہے اور دہشتگردی کے خاتمے کے عزم پر قائم ہے۔ سیکیورٹی فورسز نے واضح کیا ہے کہ شدید موسم کی پرواہ کیے بغیر جارحانہ حکمت عملی اور کڑی نگرانی کے ذریعے دہشتگردی کے خلاف کارروائیاں جاری رہیں گی۔
آپریشن کی مزید تفصیلات کے مطابق،ہلاک شدہ دہشتگردوں سے بڑی مقدار میں اسلحہ اور گولہ بارود بھی برآمد ہوا ہے۔ علاقے میں تلاشی آپریشن جاری ہے تاکہ یقینی بنایا جا سکے کہ کوئی دہشتگرد یا ان کا کوئی ہمنوا وہاں موجود نہیں ہے۔ مقامی آبادی نے سکیورٹی فورسز کی کارروائی کی تعریف کی ہے اور انہوں نے دہشتگردی کے خلاف جنگ میں مکمل تعاون کا یقین دلایا ہے۔
دیکھیں: بنگلہ دیش اور افغانستان آپس میں کپاس اور ادویات کی ٹیکس فری تجارت کریں گے