پاکستان اور وسط ایشیائی ممالک کے درمیان بڑھتے ہوئے باہمی تعلقات کو ایک نئی جہت ملنے جا رہی ہے۔ سفارتی ذرائع کے مطابق خطے کے دو اہم ممالک قازقستان اور ازبکستان کے صدور آئندہ ہفتے سرکاری دوروں پر پاکستان پہنچیں گے۔ یہ دورے تجارتی و اقتصادی شراکت داریوں کو مضبوط بنانے اور علاقائی یکجہتی کو نئی سطح پر لے جانے کے حوالے سے اہم قرار دیے جا رہے ہیں۔
تفصیلات کے مطابق قازقستان کے صدر قاسم جومارت توقایف 3 اور 4 فروری کو دو روزہ سرکاری دورے پر اسلام آباد آئیں گے۔ سفارتی حلقوں کا کہنا ہے کہ دورے کا شیڈول حتمی ہو چکا ہے اور اس کے دوران دونوں ممالک کے مابین ریلوے تعاون سے متعلق ایک اہم مفاہمتی یادداشت (ایم او یو) پر دستخط متوقع ہیں۔ یہ معاہدہ دونوں ممالک کے درمیان زمینی رابطہ کاری اور تجارتی راہداریوں کو مضبوط بنانے میں سنگ میل ثابت ہوگا، جو پورے خطے میں تجارت اور نقل و حمل کے نئے دروازے کھول سکتا ہے۔
اسی ہفتے کے آخر میں ازبکستان کے صدر شوکت مرزایوف بھی 5 اور 6 فروری کو دو روزہ سرکاری دورے پر پاکستان آئیں گے۔ ذرائع کے مطابق ازبک صدر کے دورے کا ایجنڈا اور ملاقاتوں کا شیڈول بھی حتمی کر دیا گیا ہے۔ اس دورے میں دونوں ممالک کے درمیان توانائی، انفراسٹرکچر اور باہمی تجارت میں اضافے پر مرکوز اہم معاہدے اور مشترکہ منصوبے زیر غور ہیں، جو پاکستان اور ازبکستان کے استحکام کے تعلقات میں مزید گہرائی لاسکتے ہیں۔
دیکھیے: ڈیرہ اسماعیل خان میں شادی کی تقریب کے دوران خودکش حملے میں ہلاک ہونے والے وحید ’جگری‘ محسود کون تھے؟ –