Skip to content 
پاکستان نے ٹی 20 ورلڈ کپ میں شرکت کا فیصلہ کرتے ہوئے بھارت کے خلاف میچ کے بائیکاٹ کا حتمی اعلان کر دیا ہے۔ یہ فیصلہ چیئرمین پاکستان کرکٹ بورڈ (پی سی بی) محسن نقوی اور وزیراعظم شہباز شریف کے درمیان ہونے والی اہم ملاقات کے بعد سامنے آیا۔
ذرائع کے مطابق وزیراعظم ہاؤس میں ہونے والی ملاقات میں پاکستان ٹیم کی ورلڈ کپ میں شرکت یا عدم شرکت سمیت تمام ممکنہ آپشنز پر تفصیلی غور کیا گیا۔ ملاقات کے بعد حکومت پاکستان نے پاکستان کرکٹ بورڈ کو ٹی 20 ورلڈ کپ میں شرکت کی باضابطہ منظوری دے دی۔
تاہم اس موقع پر یہ فیصلہ بھی کیا گیا کہ پاکستان 15 فروری کو بھارت کے خلاف شیڈول میچ نہیں کھیلے گا اور اس کا بائیکاٹ کیا جائے گا۔ حکومتی اور پی سی بی ذرائع کا کہنا ہے کہ یہ فیصلہ قومی وقار، یکطرفہ رویّوں اور کھیل کو سیاست سے آلودہ کرنے کے تناظر میں کیا گیا ہے۔
بھارت کا رویہ
یاد رہے کہ ایشیا کپ کے دوران بھارتی ٹیم نے چیئرمین پی سی بی محسن نقوی سے ٹرافی وصول کرنے سے انکار کیا تھا، جسے پاکستان نے غیر اسپورٹس مین اسپرٹ اور کرکٹ ڈپلومیسی کے خلاف اقدام قرار دیا۔ اس واقعے کو بھی بھارت کے خلاف میچ کے بائیکاٹ کے فیصلے میں ایک اہم پس منظر کے طور پر دیکھا جا رہا ہے۔
بنگلہ دیش کا تناظر
بنگلہ دیش کے ساتھ اظہار یکجہتی بھی اس فیصلے کا اہم عنصر ہے۔ یاد رہے کہ بھارت نے ہمیشہ کی طرح کھیلوں میں سیاست کو لاتے ہوئے بنگلہ دیشی گیند باز مستفیض کو آئی پی ایل سے باہر کیا تھا جس کے بعد بنگلہ دیش نے بھارت میں شیڈول ورلڈکپ نہ کھیلنے کا فیصلہ کیا تھا۔
بنگلہ دیش نے ورلڈکپ میچز سری لنکا منتقل کرنے کا مطالبہ کیا جسے آئی سی سی نے مسترد کرتے ہوئے بنگلہ دیش کو ورلڈکپ سے باہر کر دیا اور اسکاٹ لینڈ کو اس کی جکہ شامل کیا۔ پاکستان نے اظہار یکجہتی میں اس فیصلے کا اعلان کیا ہے۔
پاکستان کا واضح مؤقف
حکومتی ذرائع کا کہنا ہے کہ پاکستان ورلڈ کپ میں شرکت کے ذریعے عالمی کرکٹ سے وابستگی برقرار رکھے گا، مگر ایسے کسی میچ کا حصہ نہیں بنے گا جہاں قومی وقار، مساوات اور اسپورٹس مین اسپرٹ کو مجروح کیا جائے۔
پی سی بی اور حکومت نے اس عزم کا اعادہ کیا ہے کہ پاکستان کرکٹ کے میدان میں اصولی مؤقف کے ساتھ کھڑا رہے گا اور قومی مفادات پر کوئی سمجھوتہ نہیں کیا جائے گا۔
دیکھیے: بھارت میں نیپا وائرس کے پھیلاؤ کے بعد پاکستانی سرحدوں کی نگرانی سخت، ایئرپورٹس پر ایمرجنسی نافذ-
