آئی سی سی مینز ٹی 20 ورلڈ کپ 2026ء میں جہاں قومی ٹیم کو انگلینڈ کے ہاتھوں شکست کا سامنا کرنا پڑا، وہیں پاکستان کے دو اسٹار محمد نواز اور شاداب خان نے انفرادی کارکردگی کے بل بوتے پر عالمی کرکٹ میں نئے ریکارڈز قائم کر دیے۔ سری لنکا کے پالی کیلے انٹرنیشنل کرکٹ اسٹیڈیم میں کھیلے گئے میچ میں دونوں کھلاڑیوں نے اہم سنگِ میل عبور کیے۔
قومی ٹیم کے اسپنر محمد نواز نے انگلینڈ کے خلاف 3 اوورز میں 2 وکٹیں حاصل کر کے ٹی 20 انٹرنیشنل میں اپنی 100 وکٹیں مکمل کر لیں۔ وہ یہ کارنامہ انجام دینے والے چوتھے پاکستانی بولر بن گئے ہیں۔ نواز سے قبل شاداب خان، شاہین شاہ آفریدی اور حارث رؤف بھی 100 وکٹوں کا ہدف حاصل کر چکے ہیں۔ 97 میچز میں اس اعزاز تک پہنچنے والے نواز کا اکنامی ریٹ 7.16 رہا ہے۔ اس کے ساتھ ہی وہ شاداب خان کے بعد 100 وکٹیں اور 1000 رنز کا منفرد ‘ڈبل’ مکمل کرنے سے محض 81 رنز کی دوری پر ہیں۔
دوسری جانب شاداب خان نے اسی میچ میں 23 رنز کی برق رفتار اننگز کھیل کر ٹی 20 انٹرنیشنل میں اپنے 1000 رنز مکمل کر لیے۔ اس سنگِ میل کے ساتھ ہی شاداب خان ٹی 20 کرکٹ کی تاریخ کے وہ پہلے پاکستانی کھلاڑی بن گئے ہیں جنہوں نے 100 وکٹیں اور 1000 رنز کا مجموعی ریکارڈ اپنے نام کیا ہے۔ عالمی سطح پر یہ اعزاز حاصل کرنے والے وہ دنیا کے چھٹے کھلاڑی ہیں، جہاں وہ محمد نبی، سکندر رضا اور ہارڈک پانڈیا جیسے نامور آل راؤنڈرز کی صف میں شامل ہو گئے ہیں۔
اگرچہ قومی ٹیم کی مجموعی کارکردگی پر سابق کرکٹرز کی جانب سے کڑی تنقید کی جا رہی ہے تاہم محمد نواز اور شاداب خان کے ان ریکارڈز نے پاکستانی کرکٹ کے شماریاتی ریکارڈ میں ایک روشن باب کا اضافہ کیا ہے۔ شائقینِ کرکٹ ان انفرادی کامیابیوں کو ٹیم کے لیے حوصلہ افزا قرار دے رہے ہیں۔
دیکھیے: پاکستانی کرکٹ کا بحران: محض شکست نہیں، بلکہ نظام کا زوال