خیبرپختونخوا کے مختلف اضلاع میں سکیورٹی فورسز نے انٹیلی جنس معلومات پر مبنی کامیاب کاروائیاں کرتے ہوئے 20 خوارج کو ہلاک کر دیا ہے۔ پاک فوج کے شعبہ تعلقات عامہ (آئی ایس پی آر) کے مطابق یہ آپریشنز باڑہ اور بنوں کے علاقوں میں انجام دیے گئے۔
ترجمان آئی ایس پی آر کے مطابق سکیورٹی فورسز نے ضلع خیبر کے علاقے باڑہ میں دہشت گردوں کی موجودگی کی اطلاع پر کاروائی کی، جس کے نتیجے میں 10 خوارج مارے گئے۔ ڈیرہ اساعیل خان میں سات دہشت گرد جبکہ دوسری جانب ضلع بنوں میں کی گئی ایک علیحدہ کاروائی کے دوران مزید 3 دہشت گرد ہلاک ہوئے۔ فورسز نے ہلاک ہونے والے خوارج کے ٹھکانوں سے اسلحہ اور گولہ بارود بھی قبضے میں لے لیا ہے، جبکہ علاقے میں ممکنہ دیگر دہشت گردوں کے خاتمے کے لیے کلیئرنس آپریشن جاری ہے۔
وزیرِاعظم شہباز شریف نے سکیورٹی فورسز کی پیشہ ورانہ مہارت کو سراہتے ہوئے انہیں شاندار الفاظ میں خراج تحسین پیش کیا۔ اپنے بیان میں انہوں نے کہا کہ ہماری افواج دہشت گردی کے خلاف سیسہ پلائی دیوار کی مانند ہیں اور ملک سے فتنہ الخوارج کے مکمل خاتمے تک یہ جنگ جاری رہے گی۔ وزیر داخلہ محسن نقوی نے بھی کامیاب آپریشنز پر فورسز کو مبارکباد دیتے ہوئے کہا کہ خوارج کا انجام عبرتناک موت ہے اور ان کے سہولت کاروں کو کسی صورت معاف نہیں کیا جائے گا۔
دیکھیے: جھل مگسی کے تھانہ کوٹرا پر فتنہ الخوارج کا حملہ؛ 11 سالہ بچہ شہید، دو حملہ آور ہلاک