Skip to content 
اقوامِ متحدہ میں پاکستان کے مستقل مندوب سفیر عاصم افتخار احمد نے سلامتی کونسل کے ہنگامی اجلاس کے دوران لبنان میں اقوامِ متحدہ کی عبوری فورس کے تین انڈونیشیائی امن پسندوں کی شہادت کی شدید الفاظ میں مذمت کی ہے۔ انہوں نے اس واقعے کو بین الاقوامی قانون کی سنگین خلاف ورزی اور عالمی امن کی کوششوں پر کاری ضرب قرار دیا ہے۔
سلامتی کونسل سے خطاب کرتے ہوئے پاکستانی مندوب کا کہنا تھا کہ یہ المناک اور انتہائی تشویشناک واقعہ بین الاقوامی برادری کے اس مشترکہ عزم کے خلاف ہے جس کا مقصد عالمی امن و سلامتی کو برقرار رکھنا ہے۔ انہوں نے زور دیا کہ اقوامِ متحدہ کے پرچم تلے خدمات انجام دینے والے اہلکاروں کو نشانہ بنانا کسی صورت قبول نہیں کیا جا سکتا۔
سفیر عاصم افتخار نے مزید کہا کہ یہ واقعہ یو این امن مشن کے بنیادی اصولوں کو مجروح کرتا ہے۔ پاکستان نے عالمی ادارے پر زور دیا کہ وہ امن پسندوں کے تحفظ کو یقینی بنائے اور اس گھناؤنے فعل کے ذمہ داروں کا تعین کیا جائے۔ واضح رہے کہ پاکستان خود بھی اقوامِ متحدہ کے امن مشنز میں سب سے زیادہ دستے فراہم کرنے والے ممالک میں شامل ہے اور اس حوالے سے عالمی امن کے لیے دی جانے والی قربانیوں کی قدر کرتا ہے۔
دیکھیے: فتنہ الخوارج کے خلاف کامیاب آپریشن؛ خیبرپختونخوا میں 13 دہشت گرد جہنم واصل
