اسلام آباد: بھارت سے منسلک حلقوں کی جانب سے پاکستان کے “فالس فلیگ” خدشات کو پروپیگنڈا قرار دینے کی کوشش سامنے آئی ہے، جس پر پاکستانی سوشل میڈیا اور تجزیہ کاروں نے سخت ردعمل دیتے ہوئے اسے حقائق سے توجہ ہٹانے کی حکمت عملی قرار دیا ہے۔
بھارتی بیانیے میں دعویٰ کیا جا رہا ہے کہ پاکستان کی جانب سے بھارت کے ممکنہ “فالس فلیگ” اقدام سے متعلق خبردار کرنا دراصل ایک منظم گمراہ کن مہم ہے، جس کا مقصد مبینہ طور پر کسی ممکنہ کارروائی کیلئے جواز پیدا کرنا ہے۔ یہ مؤقف بھارتی سوشل میڈیا اکاؤنٹس اور بعض میڈیا حلقوں کی جانب سے پیش کیا گیا۔
دوسری جانب پاکستان میں اس الزام کو مسترد کرتے ہوئے کہا جا رہا ہے کہ اصل معاملہ برعکس ہے اور بھارتی ادارے حقائق سامنے آنے کے بعد خود کو مظلوم ظاہر کرنے کی کوشش کر رہے ہیں۔ سوشل میڈیا پر گردش کرنے والے ردعمل میں کہا گیا: “رنگے ہاتھوں پکڑے جانے کے بعد اب خود کو متاثرہ فریق ظاہر کیا جا رہا ہے اور حقائق سامنے لانے والوں پر الزام تراشی کی جا رہی ہے، یہ ایک روایتی توجہ ہٹانے کی کوشش ہے۔”
پاکستانی حلقوں کے مطابق بھارت میں بعض میڈیا ادارے اور متعلقہ نیٹ ورکس ماضی میں بھی بغیر شواہد پاکستان پر الزامات عائد کرتے رہے ہیں، اور موجودہ بیانیہ بھی اسی سلسلے کی کڑی ہے۔
تجزیہ کاروں کا کہنا ہے کہ ایسے الزامات دراصل بیانیاتی جنگ کا حصہ ہوتے ہیں، جہاں اصل حقائق کو دبانے اور عالمی رائے عامہ کو متاثر کرنے کیلئے مخالف فریق پر پیشگی الزام عائد کیا جاتا ہے۔
واضح رہے کہ حالیہ دنوں میں اس معاملے پر سوشل میڈیا پر شدید بحث جاری ہے، جہاں دونوں جانب سے متضاد دعوے سامنے آ رہے ہیں، تاہم آزاد ذرائع سے ان دعوؤں کی مکمل تصدیق تاحال ممکن نہیں ہو سکی۔
