اسلام آباد میں ایران اور امریکہ کے درمیان ہونے والے اہم مذاکرات کے اختتام پر نائب وزیراعظم و وزیر خارجہ اسحاق ڈار نے دونوں ممالک کا شکریہ ادا کرتے ہوئے پاکستان کے کردار کو خطے میں امن کیلئے اہم قرار دیا ہے۔ انہوں نے کہا کہ دونوں فریقین نے وزیراعظم شہباز شریف کی اپیل پر فوری جنگ بندی اور مذاکرات کیلئے اسلام آباد آنے کا مثبت جواب دیا۔
سرکاری بیان کے مطابق امریکی وفد کی قیادت نائب صدر جے ڈی وینس جبکہ ایرانی وفد کی سربراہی ایرانی پارلیمنٹ کے اسپیکر محمد باقر قالیباف نے کی، جو مذاکرات میں شرکت کیلئے اسلام آباد پہنچے۔ پاکستانی قیادت نے گزشتہ 24 گھنٹوں کے دوران دونوں فریقین کے درمیان متعدد ادوار میں مذاکرات میں سہولت کاری کی۔
اسحاق ڈار کے مطابق پاکستان نے بطور ثالث دونوں ممالک کے درمیان تعمیری بات چیت کو آگے بڑھانے میں کردار ادا کیا، جس کے نتیجے میں جنگ بندی کے حصول کی کوششوں میں پیش رفت ہوئی۔ انہوں نے اس امر پر زور دیا کہ فریقین جنگ بندی کے عزم کو برقرار رکھیں تاکہ خطے میں دیرپا امن ممکن بنایا جا سکے۔
بیان میں کہا گیا ہے کہ پاکستان آئندہ بھی ایران اور امریکہ کے درمیان سفارتی روابط اور مکالمے کو فروغ دینے کیلئے اپنا کردار جاری رکھے گا، جبکہ خطے میں استحکام اور خوشحالی کیلئے مثبت پیش رفت کی امید ظاہر کی گئی ہے۔
تجزیہ کاروں کے مطابق اسلام آباد مذاکرات نے پاکستان کو ایک بار پھر عالمی سفارتکاری کے اہم مرکز کے طور پر اجاگر کیا ہے، جہاں سے خطے کے بڑے تنازعات کے حل کیلئے پیش رفت ممکن بنائی جا رہی ہے۔
