مردان: خیبرپختونخوا کے ضلع مردان میں ماربل کان میں دبنے والا مزدور 17 روز بعد معجزانہ طور پر زندہ نکال لیا گیا، جسے ریسکیو ٹیموں کی طویل اور مسلسل کوششوں کا نتیجہ قرار دیا جا رہا ہے۔
ریسکیو حکام کے مطابق تحصیل رستم کے علاقے ننگ آباد میں 31 مارچ کو ماربل مائننگ کے دوران پہاڑی تودہ گرنے سے متعدد مزدور مٹی اور پتھروں تلے دب گئے تھے۔ واقعے کے بعد فوری ریسکیو آپریشن شروع کیا گیا، تاہم مشکل حالات کے باعث کارروائی میں کئی دن لگے۔
حکام کا کہنا ہے کہ اس حادثے میں 8 مزدور جاں بحق ہوئے تھے جبکہ ابتدائی مرحلے میں 2 افراد کو زندہ نکال لیا گیا تھا۔ بعد ازاں مسلسل تلاش اور کھدائی کے عمل کے دوران عبدالوہاب نامی مزدور کو 17 روز بعد زندہ نکال لیا گیا۔
ریسکیو ذرائع کے مطابق مزدور کو نکالنے کے فوراً بعد طبی امداد کے لیے اسپتال منتقل کر دیا گیا، جہاں اس کی حالت کا جائزہ لیا جا رہا ہے۔
واضح رہے کہ پہاڑی تودے گرنے کے باعث ریسکیو آپریشن کو شدید مشکلات کا سامنا رہا، تاہم ٹیموں نے مسلسل کوششیں جاری رکھیں، جس کے نتیجے میں یہ غیر معمولی کامیابی حاصل ہوئی۔
دیکھئیے:لبنان اور اسرائیل کے درمیان 10 روزہ جنگ بندی پر اتفاق، ٹرمپ نے اعلان کر دیا