واشنگٹن: امریکی صدر ڈونلڈ ٹرمپ نے لبنان اور اسرائیل کے درمیان 10 روزہ جنگ بندی پر اتفاق کا اعلان کرتے ہوئے کہا ہے کہ دونوں ممالک نے باقاعدہ طور پر جنگ بندی شروع کرنے پر رضامندی ظاہر کر دی ہے۔
صدر ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ انہوں نے لبنان کے صدر جوزف عون اور اسرائیلی وزیراعظم بنیامین نیتن یاہو سے تفصیلی گفتگو کی، جس کے نتیجے میں جنگ بندی پر اتفاق ممکن ہوا۔ ان کے مطابق جنگ بندی کا اطلاق شام 5 بجے سے ہوگا۔
ٹرمپ نے کہا کہ دونوں ممالک نے امن کے قیام کے لیے اس اقدام پر اتفاق کیا ہے اور یہ پیشرفت حالیہ سفارتی کوششوں کا نتیجہ ہے۔ انہوں نے مزید بتایا کہ منگل کو واشنگٹن ڈی سی میں لبنان اور اسرائیل کے نمائندوں کے درمیان 34 سال بعد پہلی ملاقات ہوئی، جس میں امریکی وزیر خارجہ مارکو روبیو بھی شریک تھے۔
امریکی صدر کے مطابق انہوں نے نائب صدر جے ڈی وینس اور وزیر خارجہ مارکو روبیو کو ہدایت دی تھی کہ وہ دونوں ممالک کے ساتھ مل کر پائیدار امن کے قیام کے لیے کام کریں۔
ٹرمپ کا کہنا تھا کہ دنیا بھر میں مختلف تنازعات کے خاتمے کے لیے کردار ادا کرنا ان کے لیے اعزاز کی بات ہے اور لبنان اسرائیل جنگ بندی کو انہوں نے اپنی ایک اور اہم سفارتی کامیابی قرار دیا۔
واضح رہے کہ لبنان اور اسرائیل کے درمیان کشیدگی کے باعث خطے میں سکیورٹی صورتحال انتہائی حساس رہی ہے، جبکہ اس جنگ بندی کو عارضی سکون کی جانب ایک اہم قدم قرار دیا جا رہا ہے۔