خیبر پختونخوا کے ضلع بنوں میں انڈس ہائی وے پر سیکیورٹی فورسز کی گاڑی کو دھماکے سے نشانہ بنایا گیا ہے۔ ابتدائی اطلاعات کے مطابق اس افسوسناک واقعے میں سکیورٹی فورسز کا ایک اہلکار شہید جبکہ تین دیگر شدید زخمی ہو گئے ہیں۔ دھماکہ اس وقت ہوا جب فورسز کا کانوائے پشاور سے بنوں کی جانب آ رہا تھا۔
امدادی کاروائیاں اور ہسپتال منتقل
واقعے کی اطلاع ملتے ہی پولیس اور سکیورٹی فورسز کی مزید نفری فوری طور پر جائے وقوعہ کی جانب روانہ کر دی گئی ہے۔ ریسکیو ذرائع کے مطابق شہید ہونے والے اہلکار کی میت اور زخمیوں کو فوری طور پر قریبی اسپتالوں میں منتقل کر دیا گیا ہے، جہاں زخمیوں کو طبی امداد فراہم کی جا رہی ہے۔ انتظامیہ کی جانب سے اسپتالوں میں ایمرجنسی نافذ کر دی گئی ہے۔
ناکہ بندی اور سرچ آپریشن
سکیورٹی فورسز نے دھماکے کے بعد انڈس ہائی وے کے متاثرہ حصے کو ہر قسم کی آمد و رفت کے لیے بند کر دیا ہے اور علاقے کو گھیرے میں لے کر بڑے پیمانے پر سرچ آپریشن شروع کر دیا گیا ہے۔ حکام کا کہنا ہے کہ شواہد اکٹھے کیے جا رہے ہیں تاکہ دھماکے کی نوعیت کا تعین کیا جا سکے اور ملوث عناصر کو کیفرِ کردار تک پہنچایا جا سکے۔
سکیورٹی کی مجموعی صورتحال
بنوں اور گرد و نواح میں سییورٹی ہائی الرٹ کر دی گئی ہے اور تمام داخلی و خارجی راستوں پر چیکنگ کا عمل سخت کر دیا گیا ہے۔ واضح رہے کہ سیکیورٹی فورسز کے قافلے پر یہ حملہ ایک ایسے وقت میں ہوا ہے جب علاقے میں دہشت گردی کے خلاف کارروائیاں جاری ہیں۔ حکام نے عزم ظاہر کیا ہے کہ ایسی بزدلانہ کارروائیاں فورسز کے حوصلے پست نہیں کر سکتیں۔
