اسٹیٹ بینک آف پاکستان نے اپنی بین الاقوامی مالیاتی ذمہ داریاں پوری کرتے ہوئے ابوظہبی فنڈ فار ڈیولپمنٹ کے ایک ارب ڈالر کے ڈپازٹ کی واپسی مکمل کر دی ہے۔
اسٹیٹ بینک کے مطابق 23 اپریل 2026 کو کی جانے والی اس ادائیگی کے ساتھ ہی متحدہ عرب امارات کی جانب سے پاکستان کے پاس رکھے گئے مجموعی ڈپازٹس کی واپسی کا عمل کامیابی سے اختتام پذیر ہو گیا ہے۔ واضح رہے کہ گزشتہ ہفتے بھی پاکستان نے 2.45 ارب ڈالر کے ڈپازٹس کی ادائیگی مکمل کی تھی، جس کے بعد اب یو اے ای کے مجموعی 3.45 ارب ڈالر واپس کیے جا چکے ہیں۔
معاشی ماہرین کا کہنا ہے کہ ان ڈپازٹس کی بروقت واپسی بین الاقوامی مالیاتی مارکیٹ میں پاکستان کی ساکھ کو مستحکم کرنے میں معاون ثابت ہوگی۔ یہ ادائیگیاں ایک ایسے وقت میں کی گئی ہیں جب پاکستان اپنی بیرونی ادائیگیوں کے توازن کو برقرار رکھنے اور زرمبادلہ کے ذخائر کو مستحکم کرنے کی کوششوں میں مصروف ہے۔
اسٹیٹ بینک کے ذرائع کا کہنا ہے کہ ان تمام ادائیگیوں کے لیے پیشگی انتظامات مکمل کر لیے گئے تھے تاکہ ملکی زرمبادلہ کے ذخائر پر غیر ضروری دباؤ نہ آئے۔ متحدہ عرب امارات کے ڈپازٹس کی واپسی کے اس عمل کی تکمیل کو ملکی معاشی استحکام کی جانب ایک اہم قدم قرار دیا جا رہا ہے۔