پاکستان سپر لیگ 11 کے 34 ویں میچ میں ضابطہ اخلاق کی خلاف ورزی پر محمد عامر اور فہیم اشرف پر میچ فیس کا 10 فیصد جرمانہ عائد کر دیا گیا ہے۔ یہ واقعہ راولپنڈی کنگز اور اسلام آباد یونائیٹڈ کے درمیان کھیلے گئے میچ کے دوران پیش آیا۔ دونوں کھلاڑیوں کے درمیان میدان میں تلخ کلامی ہوئی جس پر میچ ریفری نے ایکشن لیا۔
محمد عامر کی گیند پر آؤٹ ہونے کے بعد دونوں پلیئرز آپس میں الجھ پڑے۔ محمد عامر نے فہیم اشرف کو پویلین واپس جانے کا اشتعال انگیز اشارہ کیا جس پر فہیم اشرف نے سخت ردعمل دیا اور عامر کی جانب بڑھنے کی کوشش کی۔ اس دوران دونوں کھلاڑیوں کے درمیان شدید نوک جھونک ہوئی جسے ساتھی کھلاڑیوں نے بیچ بچاؤ کروا کے ختم کرایا۔
میچ ریفری نے دونوں کھلاڑیوں کو پی سی بی کے ضابطہ اخلاق کی خلاف ورزی کا مرتکب پایا۔ محمد عامر اور فہیم اشرف نے اپنی غلطی تسلیم کر لی ہے جس کے بعد ان پر میچ فیس کا 10، 10 فیصد جرمانہ عائد کر دیا گیا ہے۔ پی سی بی حکام نے واضح کیا ہے کہ میدان میں نظم و ضبط کی خلاف ورزی کو برداشت نہیں کیا جائے گا۔