کراچی: پاکستان کرکٹ ٹیم کے سابق کپتان شاہد آفریدی نے جید عالم دین اور جے یو آئی کے سابق رکن اسمبلی مولانا ادریس ترنگزئی کی شہادت پر گہرے دکھ اور افسوس کا اظہار کیا ہے۔
سابق کپتان نے اپنے آفیشل فیس بک پیج پر جاری کردہ بیان میں کہا کہ ممتاز عالم دین اور شیخ الحدیث حضرت مولانا محمد ادریس ترنگزئی کی بزدلانہ قاتلانہ حملے میں شہادت کی خبر سن کر دل انتہائی رنجیدہ ہے۔ انہوں نے دعا کی کہ اللہ تعالیٰ ان کی شہادت قبول فرمائے، درجات بلند کرے اور اہل خانہ کو صبرِ جمیل عطا کرے۔ شاہد آفریدی نے افسوس کا اظہار کرتے ہوئے کہا کہ علم و تقویٰ کا یہ ستارہ ہمیشہ یاد رکھا جائے گا، جبکہ انہوں نے اُمید ظاہر کی کہ اس حملے کے ذمہ داران کو جلد قانون کے کٹہرے میں لایا جائے گا۔
یاد رہے کہ منگل کی صبح چارسدہ کے علاقے اتمانزئی میں فتنۃ الخوارج کے دہشت گردوں نے جید عالم دین اور سابق رکن اسمبلی شیخ محمد ادریس کو اس وقت نشانہ بنایا جب وہ اپنے گھر سے مدرسے کی جانب جا رہے تھے۔ حملے کے وقت گاڑی میں مولانا ادریس، دو پولیس اہلکار اور ڈرائیور سوار تھے۔ حملہ آوروں نے گاڑی پر پیچھے سے فائرنگ کی، جس کے نتیجے میں مولانا محمد ادریس موقع پر ہی شہید ہوگئے جبکہ دو پولیس اہلکار شدید زخمی ہوئے۔
واقعے کے بعد پولیس اور قانون نافذ کرنے والے اداروں نے علاقے کو گھیرے میں لے کر کارروائی شروع کر دی ہے۔ اس اندوہناک واقعے کی ایف آئی آر تھانہ سی ٹی ڈی مردان میں درج کر لی گئی ہے اور ملوث ملزمان کی گرفتاری کے لیے چھاپے مارے جا رہے ہیں۔