روسی میڈیا نے دعویٰ کیا ہے کہ ایران نے امریکی میزائل دفاعی نظام کو ناکام بناتے ہوئے اپنے اہداف پر انتہائی درستگی کے ساتھ نئے حملے کیے ہیں۔
رپورٹ کے مطابق ایران کے نئے میزائل انتہائی تیز رفتاری سے ہدف کی جانب بڑھتے ہیں اور نشانہ بننے سے قبل اپنی پرواز کی سمت اور پوزیشن بار بار تبدیل کرتے ہیں، جس سے دفاعی نظام کے لیے انہیں روکنا مشکل ہو جاتا ہے۔
روسی میڈیا کا کہنا ہے کہ پینٹاگون اس پیش رفت پر تشویش کا شکار ہے اور اس بات کا جائزہ لے رہا ہے کہ تہران حساس اہداف کو کس طرح اس قدر درستگی سے نشانہ بنا رہا ہے۔
واضح رہے کہ ان دعوؤں کی امریکی حکام کی جانب سے تاحال باضابطہ تصدیق سامنے نہیں آئی۔
یہ خبر ایسے وقت میں سامنے آئی ہے جب اردن میں امریکی فوجی اڈے پر جمعہ کے روز ایرانی حملوں میں دو امریکی فوجی ہلاک اور متعدد زخمی ہونے کی سینٹکام تصدیق کر چکا ہے، جبکہ ایک فوجی تاحال لاپتہ ہے۔ امریکہ اور ایران کے مابین جاری تنازع مسلسل آٹھویں رات بھی جاری رہا، جس میں دونوں ممالک کے حملوں کا سلسلہ خطے کے کئی ممالک تک پھیل چکا ہے۔
