کینیڈا کی وزیرِ خارجہ انیتا آنند پاکستان کے اپنے پہلے سرکاری دورے پر اسلام آباد پہنچ گئی ہیں۔ وہ نائب وزیرِ اعظم اور وزیرِ خارجہ اسحاق ڈار کی خصوصی دعوت پر یہاں آئی ہیں۔
دفترِ خارجہ کے ترجمان کے مطابق منصب سنبھالنے کے بعد کینیڈا کی وزیرِ خارجہ کا یہ پاکستان کا پہلا دورہ ہے۔ اس دورے کے دوران نائب وزیرِ اعظم اور وزیرِ خارجہ اسحاق ڈار اور انیتا آنند کے درمیان اعلیٰ سطح کے دوطرفہ مذاکرات ہوں گے، جن میں پاکستان اور کینیڈا کے تعلقات کے تمام پہلوؤں کا تفصیلی جائزہ لیا جائے گا۔
ترجمان دفترِ خارجہ نے بتایا کہ دونوں رہنماؤں کے درمیان ہونے والی بات چیت کا بنیادی محور دوطرفہ تجارت، سرمایہ کاری، تعلیم اور عوامی سطح پر روابط کو مزید فروغ دینا ہے۔ اس کے علاوہ دونوں وزراء باہمی دلچسپی کے علاقائی اور عالمی امور پر بھی تبادلہ خیال کریں گے۔ اپنے قیام کے دوران کینیڈا کی وزیرِ خارجہ ملکی قیادت سے بھی اہم ملاقاتیں کریں گی۔
واضح رہے کہ پاکستان اور کینیڈا کے درمیان دیرینہ اور خوشگوار تعلقات قائم ہیں، جن کی بنیاد قریبی عوامی روابط پر استوار ہے اور کینیڈا میں مقیم متحرک پاکستانی تارکینِ وطن ان تعلقات کو مضبوط بنانے میں اہم کردار ادا کر رہے ہیں۔
