وزیراعلیٰ پنجاب مریم نواز نے وفاقی وزیر برائے سمندر پار پاکستانی چوہدری سالک حسین کو ہتکِ عزت کا قانونی نوٹس بھجوانے کا اعلان کردیا۔
لاہور میں ہونہار اسکالرشپ اور طلبہ میں لیپ ٹاپ تقسیم کرنے کی تقریب سے خطاب کرتے ہوئے مریم نواز نے کہا کہ چوہدری سالک حسین وفاقی وزیر ہیں، انہیں الزامات لگانے کے بجائے ثبوت پیش کرنے چاہئیں۔
انہوں نے کہا کہ اگر چوہدری سالک حسین کے پاس الزامات کے شواہد موجود ہیں تو انہیں سامنے لائیں، بصورت دیگر عدالت میں جواب دینا ہوگا۔
وزیراعلیٰ پنجاب نے گجرات کی صورتحال کا ذکر کرتے ہوئے کہا کہ پرویز الٰہی نے انہیں جو گجرات شہر دیا تھا، وہاں بارش کے پانی میں ان کی گاڑی ڈوب گئی تھی۔
مریم نواز کا کہنا تھا کہ انہیں اس بات پر تکلیف ہے کہ انہوں نے گجرات کے ڈپٹی کمشنر کو تبدیل کیا، جس کے بعد بعض افراد ترقیاتی کاموں پر پروپیگنڈا کر رہے ہیں۔
انہوں نے کہا کہ جس طرح لوگ اپنے گھروں کو صاف رکھتے ہیں، اسی طرح ملک اور شہروں کو بھی صاف رکھنا چاہیے۔ اختلافات اپنی جگہ، لیکن کسی کو ملک کے خلاف ہتھیار نہیں اٹھانے چاہئیں۔
مریم نواز نے مزید کہا کہ معاملہ کرپشن کا نہیں بلکہ الزامات اور ان کے ثبوت کا ہے۔ ان کے مطابق سفارش کی بنیاد پر عہدوں پر آنے والے افراد ملک اور عوام کے لیے نقصان کا باعث بنتے ہیں۔
چوہدری سالک اپنے بیان پر قائم
وفاقی وزیر چوہدری سالک حسین نے پنجاب میں کرپشن سے متعلق اپنے بیان پر قائم رہنے کا اعلان کرتے ہوئے کہا ہے کہ صوبے میں کرپشن ہو رہی ہے اور ان کا مؤقف درست ہے۔ انہوں نے کہا کہ ڈی سی لگوانے کے حوالے سے کوئی بات نہیں ہوئی کیونکہ متعلقہ افسر پہلے ہی تعینات تھا۔
چوہدری سالک حسین کا کہنا تھا کہ اختیار ملنے پر انسان کو عاجز رہنا چاہیے اور انہوں نے سچائی کے ساتھ اپنا جواب دیا ہے۔ واضح رہے کہ وزیراعلیٰ پنجاب مریم نواز نے ان کے الزامات پر ثبوت پیش کرنے کا مطالبہ کرتے ہوئے ہتکِ عزت کا قانونی نوٹس بھجوانے کا اعلان کیا تھا۔
