نئی دہلی: بھارتی دارالحکومت میں سی جے پی کے زیرِ اہتمام ہونے والے پرامن احتجاج پر پولیس کی سخت کارروائی کے نتیجے میں سینکڑوں مظاہرین زخمی اور متعدد کو حراست میں لے لیا گیا ہے۔ اس تشدد اور حکومتی دباؤ کے باوجود بھارتی نوجوان نسل نے پنا احتجاج جاری رکھنے کا عزم ظاہر کرتے ہوئے واضح کیا ہے کہ انصاف کا مطالبہ کرنا کوئی جرم نہیں ہے۔
مظاہرین کا کہنا ہے کہ ہر بھارتی شہری نریندر مودی کی پالیسیوں کا حامی نہیں ہے اور موجودہ نوجوان نسل تمام تر ذہنی اذیت، دباؤ اور تشدد کے باوجود اپنے اصولی مؤقف سے پیچھے نہیں ہٹے گی۔ ان کے مطابق یہی شعور اور مقاومت نیا بھارت کی حقیقی تصویر ہے۔
دہلی پولیس کی جانب سے کی جانے والی اس کارروائی پر بھارت کے مختلف سیاسی رہنماؤں اور شہریوں نے شدید تحفظات کا اظہار کیا ہے۔
عالمی انسانی حقوق کی تنظیم ایمنسٹی انٹرنیشنل نے بھی واقعے کا نوٹس لیتے ہوئے مبینہ زیادتیوں اور پرامن مظاہرین کے خلاف طاقت کے استعمال پر گہری تشویش ظاہر کی ہے۔ مظاہرین کا موقف ہے کہ تمام تر رکاوٹوں کے باوجود بالآخر انصاف ہی غالب آئے گا۔
