وفاقی تحقیقاتی ادارے (ایف آئی اے) اور سکیورٹی اداروں نے مشترکہ انٹیلی جنس بیسڈ کارروائی کرتے ہوئے افغان شہریوں کے لیے غیر قانونی طور پر جعلی دستاویزات بنانے والے منظم نیٹ ورک کو بے نقاب کر دیا ہے۔ کارروائی کے دوران نادرا کے افسران سمیت 4 ملزمان کو گرفتار کر لیا گیا ہے۔
ترجمان ایف آئی اے کے مطابق گرفتار ملزمان میں نادرا کے اسسٹنٹ ڈائریکٹر انعام الحق، ڈپٹی اسسٹنٹ ڈائریکٹر فیاض احمد، چوکیدار جنید احمد اور پرائیویٹ ایجنٹ محمد عمر شاہ شامل ہیں۔ ملزمان کے قبضے سے اہم ریکارڈ اور دیگر شواہد بھی تحویل میں لے لیے گئے ہیں۔
ابتدائی تحقیقات میں انکشاف ہوا ہے کہ ملزمان افغان شہریوں کے لیے جعلی شناختی دستاویزات کے اجرا، سرکاری ریکارڈ میں ردوبدل اور دیگر غیر قانونی سہولت کاری میں ملوث تھے۔ ابتدائی شواہد سے اس نیٹ ورک کے دہشت گرد عناصر سے بھی روابط کی نشاندہی ہوئی ہے، جس پر گہرائی سے تفتیش جاری ہے۔
ترجمان کا مزید کہنا تھا کہ واقعے کی مزید تحقیقات کا دائرہ وسیع کر دیا گیا ہے اور جلد مزید اہم انکشافات اور گرفتاریوں کی توقع ہے۔ ادارے اس نیٹ ورک سے وابستہ تمام مرکزی کرداروں اور سہولت کاروں کو قانون کے کٹہرے میں لانے کے لیے متحرک ہیں۔
ایف آئی اے اور قانون نافذ کرنے والے اداروں نے اعادہ کیا ہے کہ قومی سلامتی، جعلی شناختی دستاویزات کے اجرا اور دہشت گردی کی معاونت کرنے والے منظم جرائم پیشہ عناصر کے مکمل خاتمے تک بلاامتیاز کارروائیاں جاری رکھی جائیں گی۔
