آزاد کشمیر عام انتخابات 2026 کے پہلے مرحلے میں میرپور ڈویژن کی 13 نشستوں پر ووٹنگ کے بعد نتائج کا سلسلہ جاری ہے۔ اب تک 11 حلقوں کے حتمی و غیر حتمی نتائج سامنے آ چکے ہیں، جن میں مسلم لیگ (ن) نے 7 نشستوں پر برتری حاصل کرتے ہوئے میدان مار لیا، جبکہ پاکستان پیپلز پارٹی 4 نشستیں جیتنے میں کامیاب رہی۔ دو حلقوں کے نتائج تاحال منتظر ہیں۔
الیکشن کمیشن آزاد جموں و کشمیر نے اب تک صرف 3 حلقوں کے نتائج کا باضابطہ اعلان کیا ہے، جبکہ باقی نشستوں کے نتائج غیر سرکاری اور غیر حتمی ذرائع سے سامنے آ رہے ہیں۔
برنالہ اور سماہنی کے نتائج
حلقہ ایل اے 5 برنالہ میں مسلم لیگ (ن) کے کرنل (ر) وقار احمد نور اور پیپلز پارٹی کے چوہدری پرویز اشرف کے درمیان کانٹے دار مقابلہ دیکھنے میں آیا۔ 176 میں سے 175 پولنگ اسٹیشنوں کے نتائج کے مطابق کرنل (ر) وقار احمد نور کو معمولی برتری حاصل ہے، تاہم حلقے کا حتمی اعلان تاحال نہیں ہو سکا۔
حلقہ ایل اے 6 سماہنی میں ووٹ جلائے جانے کے واقعے کے باعث حتمی نتیجہ روک لیا گیا، البتہ مسلم لیگ (ن) کے چوہدری محمد رزاق کو آئی پی پی کے علی شان سونی پر واضح برتری حاصل ہے۔ واضح رہے کہ علی شان سونی، جو گزشتہ 3 مسلسل انتخابات جیت چکے تھے، انہیں ووٹ نذر آتش کرنے اور پولنگ اسٹیشن پر حملے کے الزام میں گرفتار کیا گیا ہے۔
بڑے سیاسی ناموں کو شکست
آزاد کشمیر انتخابات 2026 میں کئی نمایاں سیاسی شخصیات کو ناکامی کا سامنا کرنا پڑا۔ سابق وزیراعظم چوہدری انوار الحق، جو گزشتہ الیکشن میں پی ٹی آئی کے ٹکٹ پر کامیاب ہوئے تھے اور بعد میں فارورڈ بلاک میں شامل ہو گئے تھے، اس بار آزاد حیثیت سے الیکشن ہار گئے۔ حلقہ ایل اے 7 بھمبر میں مسلم لیگ (ن) کے چوہدری طارق فاروق نے واضح اکثریت سے کامیابی حاصل کی۔
پیپلز پارٹی کے صدر چوہدری محمد یاسین کو اپنی آبائی نشست چڑھوئی (ایل اے 12) میں شکست ہوئی، جہاں مسلم لیگ (ن) کے راجا ریاست خان کامیاب قرار پائے۔ تاہم چوہدری محمد یاسین نے کوٹلی سٹی (ایل اے 10) کی نشست جیت کر اپنی سیاسی ساکھ برقرار رکھی۔
اسی طرح پیپلز پارٹی کے جاوید اقبال بڈھانوی کوٹلی نکیال میں اور ولید انقلابی کھوئی رٹہ میں کامیاب نہ ہو سکے۔
میرپور ڈویژن کے حلقہ وار نتائج
ایل اے 1 ڈڈیال (میرپور): مسلم لیگ (ن) کے چوہدری اظہر صادق نے 15,427 ووٹ لے کر کامیابی حاصل کی، پیپلز پارٹی کے چوہدری افسر شاہد 9,832 ووٹ کے ساتھ دوسرے نمبر پر رہے۔ چیف الیکشن کمشنر جسٹس (ر) غلام مصطفیٰ مغل نے اس نتیجے کی باضابطہ تصدیق بھی کی۔
ایل اے 2 چکسواری/اسلام گڑھ: پیپلز پارٹی کے قاسم مجید 12,904 ووٹ لے کر کامیاب ہوئے، مسلم لیگ (ن) کے عظیم بخش چوہدری 8,182 ووٹ کے ساتھ دوسرے نمبر پر رہے۔
ایل اے 3 میرپور سٹی: پیپلز پارٹی کے یاسر سلطان 12,590 ووٹ لے کر کامیاب قرار پائے، جبکہ مسلم لیگ (ن) کے چوہدری محمد سعید 11,081 ووٹ حاصل کر سکے۔ یوں سابق صدر ریاست بیرسٹر سلطان محمود مرحوم کے صاحبزادے نے اپنی نشست برقرار رکھی۔
ایل اے 4 کھڑی شریف: مسلم لیگ (ن) کے چوہدری رخسار احمد 20,172 ووٹ لے کر کامیاب ہوئے، پیپلز پارٹی کے چوہدری صہیب ارشد 13,865 ووٹ کے ساتھ دوسرے نمبر پر رہے۔
ایل اے 8 کوٹلی 1 راج محل: پیپلز پارٹی کے ظفر اقبال ملک 19,535 ووٹ لے کر کامیاب ہوئے۔
ایل اے 9 کوٹلی 2 نکیال: مسلم لیگ (ن) کے عمیر نعیم 31,037 ووٹ لے کر کامیاب قرار پائے۔ اسی حلقے میں پولنگ کے دوران تصادم میں پیپلز پارٹی کا ایک کارکن جاں بحق ہوا تھا، جس پر بلاول بھٹو زرداری نے ن لیگی امیدوار پر الزام عائد کیا تھا۔
ایل اے 11 کوٹلی 4 سہنسہ: مسلم لیگ (ن) کے راجا محمد آصف 26,190 ووٹ لے کر کامیاب ہوئے۔
ایل اے 13 کوٹلی 6 کھوئی رٹہ: مسلم لیگ (ن) کے راجا ایاز احمد خان 21,728 ووٹ لے کر کامیاب قرار پائے، آئی پی پی کے انصر ابدالی دوسرے اور پیپلز پارٹی کے ولید انقلابی تیسرے نمبر پر رہے۔
ن لیگ کی برتری
مجموعی طور پر آزاد کشمیر انتخابات 2026 کے پہلے مرحلے میں میرپور ڈویژن سے مسلم لیگ (ن) نے واضح برتری حاصل کر لی ہے۔ باقی ماندہ حلقوں کے حتمی نتائج اور مکمل صورتحال کی تصدیق کے بعد سیاسی جماعتوں کی نشستوں کی حتمی تعداد سامنے آئے گی۔