خیبرپختونخوا کے مختلف اضلاع سوات، ہنگو، شمالی وزیرستان اور کوہاٹ میں جمعرات کو دہشت گردی اور سکیورٹی کارروائیوں کے دوران متعدد افسوسناک واقعات پیش آئے۔
ان واقعات میں پولیس افسران، اہلکاروں اور ویلج ڈیفنس کمیٹی کے رضاکاروں سمیت کئی افراد شہید اور متعدد زخمی ہوئے۔ دوسری جانب پولیس اور سکیورٹی فورسز کی جوابی کارروائیوں میں بڑی تعداد میں دہشت گرد بھی مارے گئے۔
سوات آپریشن
سوات کے بالائی علاقوں میں محکمہ انسداد دہشت گردی (سی ٹی ڈی) اور خیبرپختونخوا پولیس نے دہشت گردوں کے خلاف مشترکہ سرچ اینڈ اسٹرائیک آپریشن کیا۔
سکیورٹی ذرائع کے مطابق شدید فائرنگ کے تبادلے میں ایک پولیس اہلکار اور ویلج ڈیفنس کمیٹی کے چار رضاکار شہید ہوگئے۔ اس کارروائی میں کم از کم چھ دہشت گرد مارے گئے اور متعدد زخمی ہوئے۔ شہداء میں عمر حیات، گل زیب، محمد کریم، اختر زیب اور پولیس اہلکار گلفام شامل ہیں۔
ہنگو چیک پوسٹ پر حملہ
ضلع ہنگو کے خزینہ بانڈہ پولیس چیک پوسٹ پر دہشت گردوں نے بھاری ہتھیاروں سے حملہ کیا۔ حملے کے بعد پولیس نے بھرپور جوابی کارروائی کی۔
حملے کے دوران کمک کے لیے روانہ ہونے والی اضافی نفری پر بھی گھات لگا کر فائرنگ کی گئی، جس سے ایک بکتر بند گاڑی کو نقصان پہنچا۔
آئی جی خیبرپختونخوا ذوالفقار حمید کے مطابق ہنگو حملے میں مجموعی طور پر 10 پولیس اہلکار شہید جبکہ 28 اہلکار زخمی ہوئے۔ شہداء میں ڈی ایس پی دیار خان سمیت دیگر پولیس افسران اور اہلکار شامل ہیں۔
زخمیوں میں ڈی ایس پی مجاہد حسین بھی شامل ہیں، جنہیں دیگر زخمی اہلکاروں کے ساتھ علاج کے لیے اسپتال منتقل کیا گیا۔ آئی جی کے مطابق پولیس کی مؤثر جوابی کارروائی میں 15 دہشت گرد ہلاک اور متعدد زخمی ہوئے۔
انہوں نے پولیس اہلکاروں کی بہادری کو سراہتے ہوئے شہداء کے لیے اعلیٰ اعزازات کی سفارش کی۔ زخمیوں کو بہترین طبی سہولیات فراہم کرنے کا اعلان بھی کیا گیا۔
شمالی وزیرستان اور کوہاٹ
شمالی وزیرستان کی تحصیل میران شاہ کے علاقے تپی بنگش خیل میں ایک مسجد پر نامعلوم سمت سے آنے والے کواڈ کاپٹر حملے میں حکیم نامی ایک شہری جاں بحق ہوگیا۔ پولیس نے واقعے کی تحقیقات شروع کر دی ہیں۔
اسی روز کوہاٹ کے علاقے لاچی کے گاؤں درملک ہرناتو میں واقع مسجد ابوبکر میں دھماکا ہوا، جس سے مسجد کے دو کمرے منہدم ہوگئے۔ خوش قسمتی سے اس واقعے میں کوئی جانی نقصان نہیں ہوا۔ پولیس نے شواہد اکٹھے کرکے تحقیقات کا آغاز کر دیا ہے۔
وفاقی وزیر داخلہ محسن نقوی، وزیراعلیٰ خیبرپختونخوا، گورنر خیبرپختونخوا فیصل کریم کنڈی اور دیگر سیاسی و حکومتی شخصیات نے ہنگو حملے کی شدید مذمت کی۔
رہنماؤں نے شہداء کو خراج عقیدت پیش کیا اور زخمیوں کی جلد صحت یابی کے لیے دعا کی۔ حکام کا کہنا ہے کہ دہشت گردی کے خاتمے اور صوبے میں امن و امان کے قیام کے لیے کارروائیاں پوری قوت کے ساتھ جاری رہیں گی۔
