جی ایچ کیو راولپنڈی میں چین کی پیپلز لبریشن آرمی (پی ایل اے) کے قیام کی 99ویں سالگرہ کی پروقار تقریب منعقد ہوئی۔ اس موقع پر پاکستان اور چین کے اعلیٰ عسکری و سفارتی حکام نے شرکت کی اور دوطرفہ تعلقات کو مزید فروغ دینے کا اعادہ کیا۔
فیلڈ مارشل سید عاصم منیر نے تقریب کے معزز مہمانوں کا خیرمقدم کیا اور پیپلز لبریشن آرمی کو یومِ تاسیس پر مبارکباد پیش کی۔ انہوں نے چین کے دفاع، قومی ترقی اور عالمی امن کے فروغ میں پی ایل اے کے نمایاں کردار کو زبردست خراجِ تحسین پیش کیا۔
فیلڈ مارشل عاصم منیر نے اپنے خطاب میں کہا کہ پاکستان اور چین کی دوستی منفرد، آزمودہ اور وقت کی ہر کسوٹی پر پوری اتری ہے۔ انہوں نے تاکید کی کہ دونوں ممالک کی مسلح افواج باہمی اعتماد، غیر متزلزل تعاون اور مشترکہ اسٹریٹجک مفادات کے تحفظ کے عزم سے جڑی ہوئی ہیں۔
تقریب کے مہمانِ خصوصی چینی سفیر جیانگ زائی ڈونگ نے جی ایچ کیو میں یادگاری تقریب کے انعقاد پر آرمی چیف کا شکریہ ادا کیا۔ انہوں نے دہشت گردی کے خلاف جنگ میں پاکستان کی مسلح افواج کی عظیم قربانیوں اور خدمات کو سراہا۔
چینی سفیر نے پاکستان کے لیے چین کی غیر متزلزل حمایت کا اعادہ کرتے ہوئے کہا کہ دونوں ممالک کے درمیان ہر موسم کی اسٹریٹجک شراکت داری کو مزید مضبوط بنایا جائے گا۔ تقریب میں چینی دفاعی اتاشی میجر جنرل وانگ ژونگ اور پاک فوج کے اعلیٰ حکام بھی موجود تھے۔
دیکھیے: پاکستان نے چین کا 1.4 ارب ڈالر کا کمرشل قرض واپس کر دیا