ایرانی حمایت یافتہ حوثی گروپ نے دعویٰ کیا ہے کہ اس نے بحیرۂ احمر میں سعودی عرب کے شہر ینبع کے ساحل کے قریب ایک سعودی آئل ٹینکر کو بیلسٹک میزائلوں سے نشانہ بنایا ہے۔
غیر ملکی خبر رساں ادارے کے مطابق حوثیوں کے فوجی ترجمان یحییٰ سریع نے ایک ویڈیو بیان میں کہا کہ ان کے جنگجوؤں نے سعودی آئل ٹینکر وفا پر متعدد بیلسٹک میزائل داغے، جس کے نتیجے میں جہاز کو کامیابی سے نشانہ بنایا گیا۔
حوثی ترجمان کے مطابق یہ کارروائی بحیرۂ احمر میں ان کی جاری بحری کارروائیوں کا حصہ ہے۔ انہوں نے دعویٰ کیا کہ اس سے قبل بھی جہازوں کو نشانہ بنایا گیا ہے، اور یہ کارروائیاں اس وقت تک جاری رہیں گی جب تک ان کے مطالبات پورے نہیں ہو جاتے۔
تاحال سعودی عرب کی حکومت یا متعلقہ بحری حکام کی جانب سے اس حملے کی باضابطہ تصدیق یا تردید سامنے نہیں آئی ہے، جبکہ آئل ٹینکر کو پہنچنے والے ممکنہ نقصان یا عملے کی سلامتی کے بارے میں بھی کوئی سرکاری معلومات جاری نہیں کی گئی ہیں۔
دفاعی اور بحری امور کے ماہرین کا کہنا ہے کہ اس واقعے کے بعد بحیرۂ احمر میں بین الاقوامی جہاز رانی اور توانائی کی ترسیل کے حوالے سے سیکیورٹی خدشات مزید بڑھ گئے ہیں، کیونکہ یہ سمندری راستہ عالمی تجارت اور تیل کی نقل و حمل کے لیے انتہائی اہمیت کا حامل ہے۔
دیکھیے: پاک امریکہ کا دہشتگردی کے خلاف تعاون مضبوط بنانے پر اتفاق