پاکستان کی ہنگور آبدوزیں بھارت کے لیے بڑا خطرہ، سابق بھارتی افسر کا اعتراف

نئی دہلی: بھارتی بحریہ کے سابق وائس ایڈمرل نے پاکستان نیوی کی ہنگور کلاس آبدوزوں کو بھارتی بحریہ کے لیے بڑا چیلنج قرار دیا ہے۔

ویڈیو میں سابق بھارتی بحری افسر نے چین کے تعاون سے تیار ہونے والی ٹائپ 039 بی ہنگور کلاس آبدوزوں کی جنگی صلاحیت اور خطے میں ان کے ممکنہ اثرات پر گفتگو کی۔

سابق وائس ایڈمرل کے مطابق بھارت صرف مزید آبدوزیں خرید کر اس چیلنج کا مقابلہ نہیں کرسکتا۔ ان کا کہنا تھا کہ آبدوزوں کے خلاف کارروائی کے لیے ایک جامع اینٹی سب میرین وارفیئر نظام درکار ہوتا ہے۔

انہوں نے واضح کیا کہ بحری جنگ میں صرف آبدوز کے مقابلے میں آبدوز تعینات کرنا کافی نہیں۔ اس کے لیے نگرانی، تلاش اور آبدوز شکن کارروائیوں کا مربوط نظام ضروری ہے۔

بھارتی اہداف کو خطرہ

سابق بھارتی بحری افسر نے کہا کہ اگر پاکستان کے پاس 8 جدید آبدوزیں ہوں تو جنگ یا کسی فعال صورتحال میں 4 سے 5 آبدوزیں بیک وقت سمندر میں متحرک ہوسکتی ہیں۔

ان کے مطابق بھارت کے پاس سمندری جہازوں اور بندرگاہوں کی تعداد زیادہ ہے، جس کے باعث ان کی حفاظت ایک بڑا چیلنج بنتی ہے۔

سابق وائس ایڈمرل نے بطور سب میرین کمانڈر گفتگو کرتے ہوئے پاکستان کی جدید آبدوزوں کو بھارتی بحری اہداف کے خلاف ایک اہم تزویراتی فائدہ قرار دیا۔

دیکھیے: برکس اجلاس: عالمی رہنماؤں کے لیے صرف سبزیوں کا کھانا، مودی تنقید کی زد میں