خیبر پختونخوا کے ضلع کوہاٹ میں پولیس لائنز میں نماز جمعہ کے دوران ہونے والے خودکش حملے کے بعد سکیورٹی اداروں اور پولیس کا سرچ اینڈ کلیئرنس آپریشن تقریباً 20 گھنٹے بعد مکمل ہوگیا۔
سکیورٹی ذرائع کے مطابق پولیس اور سکیورٹی فورسز کی جوابی کارروائی میں مجموعی طور پر 8 دہشت گرد ہلاک ہوئے۔ ایلیٹ فورس کمانڈوز، کاؤنٹر ٹیررازم ڈیپارٹمنٹ (سی ٹی ڈی) اور سکیورٹی فورسز نے پولیس لائنز کی اہم عمارتوں کو کلیئر کرلیا۔
ذرائع کے مطابق پاک فوج کے کمانڈوز، جوانوں اور بم ڈسپوزل اسکواڈ نے علاقے کی مکمل تلاشی کے بعد اسے پولیس کے حوالے کردیا۔
آپریشن کی نگرانی
سکیورٹی ذرائع کے مطابق کلیئرنس آپریشن کی براہِ راست نگرانی جنرل آفیسر کمانڈنگ (جی او سی) کوہاٹ نے کی۔
آئی جی خیبر پختونخوا ذوالفقار حمید بھی جائے وقوعہ پر موجود رہے اور سکیورٹی اہلکاروں کا حوصلہ بڑھاتے رہے۔ ایڈیشنل آئی جی سی ٹی ڈی، ریجنل پولیس آفیسر کوہاٹ اور ڈی پی او کوہاٹ نے آپریشن کی قیادت کی، جبکہ جی او سی کوہاٹ بھی کارروائی کے دوران موجود رہے۔
حکام کے مطابق قانون نافذ کرنے والے اداروں نے رات بھر جاری رہنے والی کارروائی کے بعد پولیس لائنز کے مختلف حصوں کو کلیئر کرلیا۔
خودکش حملہ ناکام بنا دیا گیا
آئی جی خیبر پختونخوا کے مطابق خودکش بمبار نے قانون کے رکھوالوں کو نشانہ بنانے کی کوشش کی، تاہم سکیورٹی اداروں نے بروقت کارروائی کرتے ہوئے حملہ آوروں کو ہلاک کردیا۔
حملے میں زخمی ہونے والا ایک پولیس اہلکار بھی دم توڑ گیا، جس کے بعد واقعے میں شہید ہونے والوں کی تعداد 22 ہوگئی۔
دیکھیے: کوہاٹ حملہ: دہشت گرد گروہوں کے گٹھ جوڑ اور سرحد پار خطرات پر تشویش
