بلوچستان کے ضلع لسبیلہ میں اوتھل پوائنٹ کے قریب مسافر بس اور وین کے درمیان تصادم کے نتیجے میں 12 افراد جاں بحق اور 15 سے زائد زخمی ہوگئے۔
پولیس کے مطابق حادثے کا شکار ہونے والی مسافر بس لسبیلہ سے کراچی جا رہی تھی کہ اوتھل پوائنٹ کے قریب وین سے ٹکرا گئی۔ تصادم کے نتیجے میں متعدد افراد زخمی ہوئے۔
حادثے کی اطلاع ملتے ہی پولیس، ریسکیو ٹیمیں، ضلعی انتظامیہ اور مقامی افراد جائے وقوعہ پر پہنچ گئے۔ زخمیوں کو ایمبولینسوں کے ذریعے قریبی اسپتال منتقل کیا گیا، جہاں انہیں طبی امداد فراہم کی جا رہی ہے۔
پولیس کے مطابق حادثے کی وجوہات جاننے کے لیے تحقیقات شروع کر دی گئی ہیں۔ حکام کی جانب سے جاں بحق اور زخمی افراد کی شناخت سے متعلق مزید تفصیلات سامنے آنے کا انتظار ہے۔
