اسپین میں دو تیز رفتار ٹرینوں کے تصادم کے نتیجے میں 46 افراد ہلاک ہوگئے، جبکہ متعدد زخمی بھی ہوئے۔ حادثے کے بعد میڈرڈ سے جنوبی علاقے اندلس جانے والی ریلوے سروس معطل کر دی گئی۔
غیر ملکی میڈیا کے مطابق، حادثہ بدھ کی صبح اسپین کے صوبے تولیدو میں اُردا اور لوس یبینس کے قصبوں کے درمیان پیش آیا۔ دونوں ٹرینیں میڈرڈ سے جنوبی شہر اشبیلیہ کی جانب جانے والی تیز رفتار ریلوے لائن پر سفر کر رہی تھیں۔
اسپین کے ریلوے آپریٹر اڈیف کے مطابق، حادثے کے بعد میڈرڈ اور اندلس کے درمیان ٹرینوں کی آمدورفت روک دی گئی۔ ابتدائی اطلاعات کے مطابق، تصادم میں رینفے اور ایریو کمپنیوں کی ٹرینیں شامل تھیں۔
رپورٹس کے مطابق، رینفے کی تیز رفتار ٹرین ایریو کی ٹرین کے پچھلے حصے سے ٹکرا گئی، جس کے نتیجے میں ایریو ٹرین کی دو بوگیاں پٹری سے اتر گئیں۔ بعض بوگیاں ریلوے لائن کے ساتھ واقع ڈھلوان پر جا گریں۔
حادثے کے وقت دونوں ٹرینوں میں 500 سے زائد مسافر سوار تھے۔ ابتدائی معلومات کے مطابق، رینفے کی ٹرین میں 397 جبکہ ایریو کی ٹرین میں تقریباً 147 مسافر موجود تھے۔
حادثے کے بعد سامنے آنے والی تصاویر اور ویڈیوز میں پٹری سے اتری ہوئی بوگیاں، تباہ شدہ حصے اور ریلوے لائن کے نیچے بکھرا ملبہ دیکھا جا سکتا ہے۔
امدادی کارروائیاں جاری
حادثے کی اطلاع ملتے ہی پولیس، فائر بریگیڈ اور طبی امداد کی ٹیمیں جائے وقوعہ پر پہنچ گئیں۔ زخمیوں کو ابتدائی طبی امداد فراہم کرنے کے بعد قریبی اسپتالوں میں منتقل کیا گیا۔
قریبی قصبے اُردا کے میئر مینوئل گالان کے مطابق، امدادی اداروں نے مقامی انتظامیہ سے رابطہ کرکے متاثرہ مسافروں کے لیے ہنگامی سہولیات تیار رکھنے کی درخواست کی۔ ان میں ایک اسپورٹس ہال بھی شامل تھا، جہاں مسافروں کو عارضی طور پر ٹھہرایا جا سکتا تھا۔
حکام نے متاثرہ ریلوے روٹ پر ٹرین سروس معطل کر دی، جبکہ حادثے کی وجوہات جاننے کے لیے تحقیقات شروع کر دی گئیں۔
وزیراعظم کا اظہارِ افسوس
اسپین کے وزیراعظم پیڈرو سانچیز نے حادثے پر صدمے کا اظہار کرتے ہوئے متاثرین اور ان کے اہل خانہ سے یکجہتی کا پیغام دیا۔ انہوں نے کہا کہ وہ صورتِ حال پر نظر رکھے ہوئے ہیں اور متعلقہ حکام سے رابطے میں ہیں۔
حادثے کے باعث میڈرڈ، سیوداد ریئل اور اندلس کے درمیان تیز رفتار ٹرینوں کی آمدورفت متاثر ہوئی۔ ریلوے حکام کی جانب سے سروس کی بحالی کے وقت سے متعلق فوری طور پر کوئی حتمی اعلان سامنے نہیں آیا۔
اسپین میں یہ رواں سال تیز رفتار ٹرینوں کا دوسرا بڑا حادثہ ہے۔ جنوری میں صوبہ قرطبہ کے علاقے آدموز کے قریب بھی ٹرین حادثے میں 46 افراد ہلاک ہوگئے تھے۔
جنوری کے حادثے کے بعد اسپین میں ریلوے لائنوں کی دیکھ بھال اور اس شعبے میں سرمایہ کاری کے حوالے سے بحث شروع ہوئی تھی۔ تاہم، تازہ حادثے کی وجوہات تاحال واضح نہیں ہو سکیں۔
