کراچی کے علاقے شاہ فیصل کالونی میں ایک شخص نے فائرنگ کرکے اپنی دو بہنوں کو قتل کر دیا۔ پولیس کے مطابق واقعہ ذاتی رنجش اور گھریلو جھگڑے کے باعث پیش آیا۔
پولیس نے مقتول بہنوں کی شناخت 25 سالہ ثوبیہ اور 20 سالہ حرا کے نام سے کی ہے۔ پولیس کے مطابق ملزم رحیم عرف ڈاکو نے دونوں بہنوں پر فائرنگ کی۔ جائے وقوعہ سے گولیوں کے پانچ خول بھی ملے ہیں۔
ایس ایس پی کورنگی فدا حسین کے مطابق ابتدائی معلومات میں سامنے آیا ہے کہ بہنوں کی جانب سے طعنے دینے پر ملزم مشتعل ہوا اور اس نے فائرنگ کر دی۔
پولیس کے مطابق ملزم کے والد کا پانچ روز قبل انتقال ہوا تھا۔ گزشتہ روز اس کے ہاں بیٹے کی پیدائش ہوئی، تاہم نومولود بھی بعد میں انتقال کر گیا۔ اسی رات ملزم نے اپنی اہلیہ کو بھی طلاق دے دی تھی۔
پولیس کا کہنا ہے کہ واقعے کی صبح ملزم کی والدہ کو دل کا دورہ پڑا تھا۔ ان واقعات کے بعد ملزم شدید ذہنی دباؤ کا شکار تھا۔
پولیس کے مطابق رحیم عرف ڈاکو کا مجرمانہ ریکارڈ بھی موجود ہے۔ وہ ماضی میں متعدد بار گرفتار ہو کر جیل جا چکا ہے۔
پولیس نے واقعے کی تحقیقات شروع کر دی ہیں۔ حکام واقعے کے محرکات اور دیگر پہلوؤں کا جائزہ لے رہے ہیں۔
