سعودی اتحادی فوج نے دعویٰ کیا ہے کہ حوثی باغیوں کی جانب سے مکہ مکرمہ کی سمت بھیجا گیا ڈرون فضائی کارروائی میں تباہ کر دیا گیا۔
غیر ملکی خبر رساں ادارے رائٹرز کے مطابق سعودی اتحادی فوج کے ترجمان نے بتایا کہ ڈرون کا رخ مکہ مکرمہ کی جانب تھا اور اسے ہدف تک پہنچنے سے پہلے ہی فضا میں تباہ کر دیا گیا۔
رپورٹ کے مطابق اس واقعے سے متعلق مزید تفصیلات فراہم نہیں کی گئیں کہ ڈرون کو کس مقام پر نشانہ بنایا گیا اور اسے تباہ کرنے کے لیے کون سا دفاعی نظام استعمال کیا گیا۔
حوثی ترجمان کی تردید
حوثی عسکری ترجمان یحییٰ سریع نے مکہ مکرمہ کی جانب ڈرون بھیجنے کے سعودی عرب کی قیادت میں قائم عرب اتحاد کے دعوے کی تردید کرتے ہوئے کہا ہے کہ سعودی حدود میں ایسی کوئی کارروائی نہیں کی گئی۔ انہوں نے اس دعوے کو جھوٹا قرار دیا۔
یحییٰ سریع کے مطابق حوثیوں کی کارروائیاں سعودی عرب کی فوجی تنصیبات اور تیل کے انفراسٹرکچر تک محدود ہیں، مقدس مقامات اور شہریوں کو نشانہ بنانا ان کی حکمتِ عملی کا حصہ نہیں۔ یہ بیان عرب اتحاد کے اس دعوے کے بعد سامنے آیا ہے کہ اس نے مکہ مکرمہ کی جانب آنے والا حوثی ڈرون تباہ کر دیا تھا۔
