خیبرپختونخوا کے ضلع جنوبی وزیرستان کے علاقے انگور اڈہ میں افغان سرحدی پوسٹوں سے پاکستانی چوکیوں پر بلااشتعال فائرنگ کی گئی، جس کے جواب میں پاکستانی سکیورٹی فورسز نے مؤثر کارروائی کرتے ہوئے متعدد افغان پوسٹوں کو نشانہ بنایا۔
جنوبی وزیرستان لوئر کے ڈپٹی کمشنر نے یکم نومبر کو سماجی رابطے کی ویب سائٹ ایکس پر جاری بیان میں بتایا کہ افغان سرحدی پوسٹوں سے پاکستانی چوکیوں پر بلااشتعال فائرنگ کی گئی۔
انہوں نے کہا کہ پاکستانی سکیورٹی فورسز نے فوری جوابی کارروائی کرتے ہوئے متعدد افغان سرحدی پوسٹوں، مارٹر پوزیشنز اور دفاعی چوکیوں کو نشانہ بنایا۔
ڈپٹی کمشنر کے مطابق پاکستانی فورسز کی مؤثر جوابی کارروائی کے بعد افغان طالبان اہلکار اپنی پوسٹیں چھوڑ کر فرار ہوگئے۔
انہوں نے بتایا کہ پاکستانی جانب سرحدی علاقوں میں کسی جانی نقصان کی اطلاع نہیں ملی۔ پاکستانی سکیورٹی فورسز ہر قسم کی جارحیت کا بھرپور جواب دینے کے لیے تیار ہیں۔
واقعے کے بعد انگور اڈہ کے سرحدی علاقے میں صورت حال پر پاکستانی فورسز چوکس ہیں۔
