ہزارہ موٹروے پر حویلیاں کے قریب مسافر بس اور ڈمپر کے درمیان خوفناک تصادم کے نتیجے میں 6 افراد جاں بحق اور 12 زخمی ہوگئے۔
ریسکیو حکام کے مطابق مسافر بس گلگت سے راولپنڈی جا رہی تھی کہ حویلیاں کے قریب اترائی میں ڈمپر سے ٹکرا گئی۔ حادثہ اتنا شدید تھا کہ 6 افراد موقع پر ہی جاں بحق جبکہ 12 زخمی ہوگئے۔
ریسکیو حکام کا کہنا ہے کہ بظاہر حادثہ بس کے بریک فیل ہونے کے باعث پیش آیا، تاہم اس کی حتمی وجہ معلوم کرنے کے لیے تحقیقات کی جارہی ہیں۔
حادثے کی اطلاع ملتے ہی ریسکیو ٹیموں نے موقع پر پہنچ کر امدادی کارروائیاں شروع کردیں۔ جاں بحق افراد کی لاشیں ڈسٹرکٹ ہیڈکوارٹر اسپتال منتقل کردی گئیں، جبکہ زخمیوں کو طبی امداد کے لیے ایوب میڈیکل کمپلیکس روانہ کیا گیا۔
