کراچی: شہر میں رواں برس اسٹریٹ کرائم کی وارداتوں میں شہریوں کو بھاری نقصان اٹھانا پڑا، جہاں 5 نومبر تک 46 ہزار 617 واقعات رپورٹ ہوئے۔ ان وارداتوں کے دوران ڈاکوؤں کی فائرنگ سے 65 شہری قتل اور 182 زخمی ہوئے۔
جیو نیوز کے مطابق پولیس ریکارڈ میں رواں برس ڈکیتی کے دوران مزاحمت پر قتل ہونے والے شہریوں کی تعداد 51 بتائی گئی ہے۔
رپورٹ کے مطابق 5 نومبر تک شہریوں سے 16 ہزار 821 موبائل فون چھینے گئے، جبکہ 28 ہزار 495 گاڑیاں اور موٹر سائیکلیں چوری یا چھینی گئیں۔
ان میں 4 ہزار 273 گاڑیاں اور موٹر سائیکلیں چھینی گئیں، جبکہ 25 ہزار 523 گاڑیاں اور موٹر سائیکلیں چوری ہوئیں۔
اعداد و شمار کے مطابق کراچی میں روزانہ اوسطاً 54 سے زائد موبائل فون چھینے گئے۔ اسی طرح گاڑیوں کی چوری اور چھیننے کی یومیہ شرح 4.21 رہی، جبکہ موٹر سائیکلیں چھیننے اور چوری ہونے کی اوسط روزانہ 92 سے زیادہ رہی۔
