افغان طالبان حکومت اور کالعدم ایسٹ ترکستان اسلامک موومنٹ (ای ٹی آئی ایم) کا مبینہ گٹھ جوڑ ایک بار پھر کھل کر سامنے آگیا ہے۔ طالبان کے انٹیلی جنس ونگ جی ڈی آئی سے وابستہ میڈیا پلیٹ فارم نے ایک پراپیگنڈا ویڈیو جاری کی ہے۔
پشتو زبان میں مصنوعی ذہانت سے تیار کردہ اس ویڈیو میں عثمان باتور کی مسلح کارروائیوں کو سراہا گیا ہے۔ ویڈیو میں سنکیانگ کی علیحدگی پسند تحریک کو باقاعدہ ہیرو ازم کا رنگ دیا گیا ہے۔
ای ٹی آئی ایم کی تشہیر
جاری کردہ مواد میں چین کے خطے سنکیانگ کو مقبوضہ مشرقی ترکستان قرار دیا گیا ہے۔ ویڈیو میں چینی افواج کو قابض کمیونسٹ فورسز کہہ کر پکارا گیا ہے۔
یہ مکمل بیانیہ کالعدم تنظیم ای ٹی آئی ایم کے علیحدگی پسند مؤقف کی ہو بہو عکاسی کرتا ہے۔ تجزیہ کاروں کے مطابق طالبان میڈیا نیٹ ورک سے ایسا مواد نشر ہونا دونوں کے قریبی فکری اور عملی تعلقات کو ظاہر کرتا ہے۔
کابل رجیم کے کردار پر سوالات
جی ڈی آئی افغان عبوری حکومت کے میڈیا اور پراپیگنڈا فریم ورک میں کلیدی کردار ادا کرتی ہے۔ سرکاری سطح پر زیرِ اثر پلیٹ فارم سے ایسے مواد کا جاری ہونا کسی بھی طرح محض ایک عام تاریخی ذکر نہیں ہے۔
دفاعی مبصرین کے مطابق اس اقدام نے واضح کر دیا ہے کہ افغان سرزمین پر موجود شدت پسندوں کو کابل سے نظریاتی اور میڈیا سپورٹ حاصل ہے۔ اس پیش رفت نے خطے کی سلامتی اور طالبان کے عالمی وعدوں پر سنگین سوالات کھڑے کر دیے ہیں۔
دیکھیے: طالبان کا شہری ہلاکتوں کا بیانیہ: سرحد پار دہشت گردی چھپانے کی مذموم کوشش
