وزارت اطلاعات و نشریات نے انگور اڈہ سرحدی واقعے پر افغان طالبان حکومت کے موقف کو یکسر مسترد کرتے ہوئے اسے حقیقت کے برعکس اور فریب پر مبنی پراپیگنڈا قرار دیا ہے۔
وزارت اطلاعات کے مطابق افغان طالبان کی فورسز نے پاکستانی حدود میں غیر مسلح شہریوں پر بلااشتعال فائرنگ کی اور مارٹر گولے برسائے۔ ترجمان کا کہنا ہے کہ یہ کارروائی بھارت کی ہدایات اور طے شدہ طریقہ کار کے تحت کی گئی۔
پاکستانی سیکیورٹی فورسز نے فوراً اور موثر جوابی کارروائی کرتے ہوئے افغان فورسز کی فائرنگ کو خاموش کرا دیا۔ اس بھرپور جواب کے نتیجے میں طالبان کی 7 چوکیاں تباہ ہوئیں اور انہیں بھاری جانی و مالی نقصان اٹھانا پڑا۔
وزارت اطلاعات نے مزید کہا کہ طالبان ترجمانوں کے ایسے بیانات بے وقعت اور من گھڑت کہانیوں کا حصہ ہیں۔ افغان حکومت اپنی عوام کو گمراہ کرنے کے لیے ایسا بیانیہ پیش کر رہی ہے جو پہلے ہی ان کے مسلط کردہ نظام سے پریشان ہیں۔
