تحریکِ انصاف کے مرکزی رہنما اسد قیصر نے بنوں میں دہشت گردی کے واقعات کی مذمت کرتے ہوئے وطن محافظوں کی قربانیوں کو خراجِ تحسین پیش کیا۔ ان کا کہنا تھا بنوں سمیت خیبرپختونخوا کے مختلف علاقوں میں سیکیورٹی کاروائیوں کے دوران جامِ شہادت نوش کرنے ملک محافظوں کو خراجِ عقیدت پیش کرتا ہوں۔
سابقہ حکمران جماعت کے مرکزی رہنما اسد قیصر نے کہا کہ روزانہ کی بنیاد پر فوجی جوانوں اورعام شہریوں کی شہادتیں قابلِ تشویش ہیں۔
انہوں نے اپنے آفیشل ٹویٹر اکاؤنٹ پر شہدا کو خراج تحسین پیش کرتے ہوئے کہا ضرورت اس امر کی ہے ہمیں دہشت گردی کے خلاف جامع پالیسی مرتب کرنا ہوگی۔ اور اس کے لیے تمام اداروں اور تمام جماعتوں کو اعتماد میں لیکر جامع حکمتِ عملی اپنانا ہوگی۔
اسی طرح عوام اور افواجِ پاکستان کے درمیان بڑھتے ہوئے فاصلے بھی کم کرنے ہونگے تب کہیں جا کر دہشت گردوں کے خلاف کاروائیاں مؤثر ہوسکیں گی۔ انکا کہنا تھا گزشتہ تین دہائیوں کے فوجی آپریشن کے دوران خیبرپختونخوا کے عوام نے بھاری قیمت چکائی ہے۔
نتیجتاً لوگ بے گھر ہوئے اور معیشت بھی تباہ ہوئی جن کے اثرات آج بھی کے پی کے مختلف اضلاع میں نظر آتے ہیں۔
اسد قیصر نے مطالبہ کیا کہ تمام اسٹیک ہولڈرز کو شامل کر کے ایک ایسی جامع پالیسی مرتب کی جائے کہ قوم بھی سیاسی و عسکری قیادت کے شانہ بشانہ کھڑی ہوسکے۔