وزیردفاع خواجہ آصف نے خیبرپختونخوا کے وزیراعلیٰ علی امین گنڈاپور اور تحریک انصاف کی قیادت پر سخت تنقید کی ہے۔ انہوں نے کہا کہ پی ٹی آئی رہنما پاک فوج کے شہداء کے جنازے میں شریک نہ ہوکر واضح کر رہے ہیں کہ وہ کس کے ساتھ کھڑے ہیں۔
خواجہ آصف نے اپنے سوشل میڈیا اکاؤنٹ ایکس پر پیغام میں سوال اٹھایا کہ “تحریک انصاف اس جنگ میں کس کے ساتھ ہے؟ کیا وہ وطن پر قربان ہونے والے شہداء کے ساتھ ہے یا بھارتی سپانسرڈ دہشت گردوں کے ساتھ جو افغانستان سے آتے ہیں؟”
انہوں نے مزید کہا کہ جنوبی وزیرستان میں ہونے والے آپریشن کے دوران بھارتی سرپرستی میں افغانستان سے آنے والے دہشت گردوں نے ہمارے 12 بہادر جوانوں کو شہید کیا۔ سول اور فوجی قیادت نے شہداء کے جنازے میں شرکت کی، تاہم وزیراعلیٰ خیبرپختونخوا یا پی ٹی آئی کا کوئی نمائندہ شریک نہ ہوا۔
واضح رہے کہ وزیراعظم شہباز شریف، آرمی چیف فیلڈ مارشل سید عاصم منیر اور دیگر اعلیٰ حکام نے شہداء کی نماز جنازہ میں شرکت کی تھی۔ اس موقع پر وزیراعظم نے کہا کہ افغانستان کو صاف الفاظ میں بتادیا گیا ہے کہ اسے پاکستان اور دہشت گردوں میں سے کسی ایک کا انتخاب کرنا ہوگا۔
سیاسی مبصرین کے مطابق دفاعی وزیر کی یہ تنقید تحریک انصاف اور وفاقی حکومت کے درمیان کشیدگی کو مزید بڑھا سکتی ہے لیکن خواجہ آصف بہرحال یہ سوال پوچھنے میں جق بجانب ہیں کہ آخر کیوں اس صوبے کی وزیر اعلی نے نماز جنازہ میں شرکت نہیں کی جس کے صوبے میں یہ واقعہ پیش آیا ہے۔
دیکھیں: وزیر اعظم اور فیلڈ مارشل سید عاصم منیر کا بنوں کا دورہ، دہشت گردی کے خلاف عزم کا اعادہ