آزاد جموں و کشمیر قانون ساز اسمبلی کے انتخابات 2026 کے پہلے مرحلے میں پولنگ کا آغاز ہو گیا۔میرپور ڈویژن کے تین اضلاع میرپور، کوٹلی اور بھمبر کے 13 حلقوں میں ووٹرز اپنے نمائندوں کا انتخاب کریں گے۔ پولنگ کا عمل صبح 8 بجے شروع ہوا اور شام 5 بجے تک جاری رہے گا۔
انتخابی عمل کے لیے تمام انتظامات مکمل کر لیے گئے ہیں، جبکہ انتخابی عملے کو پولنگ کا سامان فراہم کر دیا گیا ہے۔ امن و امان برقرار رکھنے کے لیے سکیورٹی کے خصوصی انتظامات بھی کیے گئے ہیں۔
میرپور ڈویژن کے 13 انتخابی حلقوں میں مجموعی طور پر 14 لاکھ ایک ہزار 439 ووٹرز اپنا حقِ رائے دہی استعمال کریں گے۔ ان میں 7 لاکھ 25 ہزار 118 مرد اور 6 لاکھ 75 ہزار 628 خواتین ووٹرز شامل ہیں۔
انتخابی عمل کے لیے ڈویژن بھر میں 2 ہزار 454 پولنگ اسٹیشنز قائم کیے گئے ہیں۔ ضلع میرپور کے 4 حلقوں میں 597، ضلع کوٹلی کے 6 حلقوں میں 1107 جبکہ ضلع بھمبر کے 3 حلقوں میں 608 پولنگ اسٹیشنز قائم کیے گئے ہیں۔
ان حلقوں میں سیاسی جماعتوں کے امیدواروں کے ساتھ ساتھ آزاد امیدوار بھی میدان میں ہیں۔
پیپلز پارٹی، مسلم لیگ (ن) اور استحکام پاکستان پارٹی سمیت مختلف سیاسی جماعتوں اور آزاد امیدواروں کے درمیان مقابلہ ہوگا، جبکہ مجموعی طور پر 296 امیدوار انتخابی میدان میں موجود ہیں۔
چیف الیکشن کمشنر آزاد کشمیر جسٹس (ر) غلام مصطفیٰ مغل نے واضح کیا ہے کہ ووٹنگ کے عمل میں رکاوٹ ڈالنے یا انتخابی ماحول خراب کرنے والوں کے خلاف قانون کے مطابق کارروائی کی جائے گی۔
چیف سیکرٹری آزاد جموں و کشمیر خوشحال خان نے کہا کہ پرامن انتخابات کے انعقاد کے لیے تمام ریاستی ادارے مکمل طور پر تیار ہیں۔
ان کا کہنا تھا کہ انتخابی عمل میں خلل ڈالنے یا امن و امان خراب کرنے کی کوشش کرنے والوں کے خلاف سخت کارروائی عمل میں لائی جائے گی۔
انتخابات کے پہلے مرحلے میں عوامی فیصلے کا انتظار ہے، جبکہ تمام نظریں اب پولنگ کے عمل اور نتائج پر مرکوز ہیں۔
دیکھیے: مسئلہ کشمیر کا منصفانہ حل ہی جنوبی ایشیا میں امن کی ضمانت ہے، اسحاق ڈار