بلوچستان میں دہشت گرد تنظیموں کی جانب سے خواتین کے مبینہ استعمال کے معاملے پر مولانا ہدایت الرحمن کے سکیورٹی اقدامات سے متعلق اعتراضات پر سوالات اٹھائے گئے ہیں۔
مؤقف میں کہا گیا ہے کہ بلوچ معاشرے میں خواتین کی عزت اور احترام کو بنیادی اہمیت حاصل ہے، تاہم بی ایل اے اور بی ایل ایف پر خواتین کو دہشت گرد کارروائیوں میں استعمال کرنے کے الزامات عائد کیے جاتے رہے ہیں۔
مؤقف کے مطابق ان تنظیموں نے خواتین کو خودکش حملہ آور، سہولت کار، سامان منتقل کرنے والی اور دیگر معاون کرداروں میں استعمال کیا۔ اپریل 2022 میں کراچی یونیورسٹی میں شاری بلوچ کی جانب سے کیا گیا خودکش حملہ بھی اسی سلسلے کی ایک مثال قرار دیا گیا ہے۔
مؤقف میں کہا گیا ہے کہ بلوچ یکجہتی کمیٹی کا بیانیہ بھی ایسے رجحانات کو تقویت دیتا ہے، جبکہ خواتین کو دہشت گرد نیٹ ورکس میں شامل کیے جانے کے باعث سیکیورٹی اقدامات سخت کیے گئے ہیں۔
سکیورٹی چیکنگ پر اعتراض
مولانا ہدایت الرحمن نے الزام عائد کیا ہے کہ جیونی اور پشکان سے آنے والی باپردہ خواتین کو چیک پوسٹوں پر روک کر پردہ ہٹانے، کیمرے کے سامنے کھڑا کرنے اور تصاویر لینے پر مجبور کیا جاتا ہے۔ انہوں نے اسے خواتین کی عزت نفس مجروح کرنے کے مترادف قرار دیا ہے۔
اس کے جواب میں کہا گیا ہے کہ سکیورٹی چیکنگ کا مقصد خواتین کو ہدف بنانا نہیں بلکہ شناخت کی تصدیق اور مطلوب افراد کی نشاندہی کرنا ہے۔
مؤقف کے مطابق شناخت کا عمل نیا نہیں۔ نادرا شناختی کارڈ، ڈرائیونگ لائسنس، ہوائی سفر اور حج سے متعلق سفری دستاویزات میں بھی شناختی تصویر کا استعمال ہوتا ہے۔
شناخت کا عمل ضروری قرار
مؤقف میں کہا گیا ہے کہ بلوچستان میں خواتین کے دہشت گرد نیٹ ورکس سے مبینہ روابط کے تناظر میں شناخت کا عمل سیکیورٹی کے لیے اہم ہے۔
حکومت بلوچستان کی جانب سے دہشت گردی سے منسلک ہونے کے الزام میں 9 خواتین کے پوسٹر جاری کیے جانے کا بھی حوالہ دیا گیا، جن کا تعلق گوادر، جیونی اور تربت سے بتایا گیا ہے۔
مؤقف میں سوال اٹھایا گیا کہ اگر خواتین کو دہشت گرد نیٹ ورکس میں استعمال کیے جانے کے شواہد موجود ہیں تو ان کی شناخت کے لیے کیے جانے والے سیکیورٹی اقدامات پر اعتراض کیوں کیا جا رہا ہے؟
سوال دہشت گردی کا ہے
مؤقف میں کہا گیا ہے کہ سکیورٹی اقدامات کو خواتین یا مردوں کے تناظر میں دیکھنے کے بجائے دہشت گردی کے خطرے کے تناظر میں دیکھا جانا چاہیے۔
اس میں واضح کیا گیا کہ جو بھی شخص دہشت گردی میں ملوث ہوگا، اسے قانون کا سامنا کرنا ہوگا اور خواتین کو ڈھال بنا کر قانون سے بچنے یا بلوچ عوام کی نمائندگی کا دعویٰ نہیں کیا جا سکتا۔
مؤقف کے مطابق دہشت گردی کی کوئی جنس نہیں اور قانون کا احتساب بھی جنس کی بنیاد پر نہیں ہونا چاہیے۔
دیکھیے: کالعدم بی ایل ایف کے سرغنہ اللہ نذر کا بھارتی گٹھ جوڑ اور پراپیگنڈا بے نقاب