خیبر پختونخوا کے ضلع بنوں میں تھانہ میریان کے سامنے ہونے والے ایک افسوسناک دھماکے میں ایک بچے سمیت دو افراد شہید اور 16 زخمی ہو گئے ہیں۔ ابتدائی اطلاعات کے مطابق دھماکہ اس قدر شدید تھا کہ اس کی آواز دور دور تک سنی گئی، جس کے نتیجے میں تھانے کی عمارت اور قریبی تنصیبات کو بھی نقصان پہنچا ہے۔
دھماکے کی اطلاع ملتے ہی ریسکیو ٹیمیں اور سکیورٹی فورسز فوری طور پر جائے وقوعہ پر پہنچ گئیں اور تمام زخمیوں کو طبی امداد کے لیے بنوں کے ڈسٹرکٹ ہیڈ کوارٹر ہسپتال منتقل کر دیا گیا ہے۔ ہسپتال ذرائع کے مطابق زخمیوں میں سے بعض کی حالت تشویشناک بتائی جا رہی ہے، جس کے باعث ہسپتال میں ایمرجنسی نافذ کر دی گئی ہے۔
واقعے کے فوراً بعد بنوں پولیس کی مزید نفری میریان روانہ کر دی گئی ہے اور سیکیورٹی اہلکاروں نے علاقے کو مکمل طور پر سیل کر کے شواہد اکٹھے کرنا شروع کر دیے ہیں۔ پولیس حکام کا کہنا ہے کہ دھماکے کی نوعیت کا تعین کیا جا رہا ہے اور تخریب کاروں کی تلاش کے لیے گرد و نواح میں بڑے پیمانے پر سرچ آپریشن کا آغاز کر دیا گیا ہے۔ ابھی تک کسی گروہ نے اس حملے کی ذمہ داری قبول نہیں کی ہے، تاہم سیکیورٹی ادارے صورتحال کا باریک بینی سے جائزہ لے رہے ہیں۔
دیکھیے: اگر امریکہ نے ایران پر حملہ کیا تو افغانستان تہران کی مکمل حمایت کرے گا؛ ذبیح اللہ مجاہد کا اعلان