مظفر آباد: آپریشن بنیان مرصوص ‘معرکہِ حق’ میں پاکستان کی تاریخی کامیابی اور بھارتی افواج کی عبرت ناک شکست کو ایک سال مکمل ہونے پر پاکستان اور ریاستِ آزاد جموں و کشمیر بھر میں یومِ فتح بھرپور جوش و جذبے کے ساتھ منایا گیا۔ ریاست کے طول و عرض میں جشن اور شکرانے کی تقریبات کا سلسلہ جاری رہا، جس میں عوام نے اپنی مسلح افواج کے ساتھ والہانہ محبت اور یکجہتی کا اظہار کیا۔
مظفر آباد، میرپور، پونچھ اور نیلم سمیت آزاد کشمیر کے تمام اضلاع، تحصیلوں اور بڑے قصبوں میں جلسے، جلوس اور سیمینارز منعقد کیے گئے۔ ان تقریبات میں زندگی کے مختلف شعبوں سے تعلق رکھنے والے افراد بشمول اساتذہ، طلبہ، تاجروں، وکلا، دانشوروں اور سول سوسائٹی کے نمائندوں نے بڑی تعداد میں شرکت کی۔ شرکا نے سبز ہلالی پرچم اور پاک فوج کے حق میں بینرز اٹھا رکھے تھے، جبکہ فضا ’پاکستان زندہ باد‘ اور ’افواجِ پاکستان پائندہ باد‘ کے نعروں سے گونجتی رہی۔
مقررین نے اپنے خطاب میں کہا کہ ایک سال قبل مئی 2025 میں افواجِ پاکستان نے دشمن کی جارحیت کو نہ صرف اپنی پیشہ ورانہ مہارت اور جذبہِ حریت سے پسپا کیا بلکہ اسے عالمی سطح پر دھول چاٹنے پر مجبور کر دیا۔ اس معرکہِ حق نے دنیا پر واضح کر دیا کہ پاکستان کا دفاع ناقابلِ تسخیر ہے اور ہماری مسلح افواج ملکی سرحدوں اور قومی وقار کے تحفظ کی بھرپور صلاحیت رکھتی ہیں۔ مقررین نے اس فتح کو ملک و قوم کے روشن مستقبل اور استحکام کی علامت قرار دیا۔
ان تقریبات کے ذریعے دشمن ملک بھارت کو ایک واضح اور دوٹوک پیغام بھیجا گیا کہ پاکستانی قوم اور مسلح افواج ہر وقت الرٹ اور متحد ہیں۔ شرکا کا کہنا تھا کہ بھارت نے ماضی کی شکست سے سبق نہ سیکھا اور مستقبل میں کسی بھی قسم کی مہم جوئی یا ‘مس ایڈوانچر’ کی کوشش کی تو اس کا انجام پہلے سے بھی زیادہ عبرت ناک اور تکلیف دہ ہوگا۔ مساجد میں نمازِ فجر کے بعد ملک کی سلامتی اور معرکہِ حق کے شہدا کے درجات کی بلندی کے لیے خصوصی دعائیں بھی مانگی گئیں۔