مشہور یوٹیوبر سعد الرحمان المعروف ڈکی بھائی کو کیمپ جیل لاہور سے رہا کر دیا گیا۔ رہائی کے موقع پر ان کے اہل خانہ اور قریبی ساتھی جیل کے باہر موجود تھے۔ خیال رہے کہ ڈکی بھائی کو نیشنل سائبر کرائمز انویسٹی گیشن ایجنسی نے 17 اگست 2025 میں لاہور ایئرپورٹ سے گرفتار کیا تھا، گرفتاری کی وجہ جوئے کی ایپس کی تشہیر تھی۔
ڈکی بھائی نے اپنی گرفتاری کے خلاف عدالت میں درخواست بھی دائر کی تھی لیکن بارہا مرتبہ انکی خواست مسترد ہوگئی تھی۔ تاہم آج سے چار روز قبل 24 نومبر بروز سوموار کو لاہور ہائی کورٹ نے جوئے کی ایپس کی تشہیر سے متعلق مقدمے میں ڈکی بھائی کی 10 لاکھ روپے کے دو مچلکوں پر ضمانت منظور کرلی تھی۔
سماعت کے دوران جسٹس شہرام سرور نے تبصرہ کرتے ہوئے کہا کہ سپریم کورٹ کے اصولوں کے مطابق ایسے معاملات میں ضمانت روکنا غیر معمولی بات ہوگی۔ خیال رہے کہ ڈکی بھائی کے خلاف ایف آئی اے کے نیشنل کرائم ایجنسی ونگ کی جانب سے آن لائن جوئے کی تشہیر کے الزام میں مقدمہ درج ہے اور تحقیقات اب بھی جاری ہیں۔