راولپنڈی: وزیر سکندر کی جانب سے فیلڈ مارشل سید عاصم منیر کی تصویر کو چوم کر ان سے محبت اور اعتماد کا اظہار محض ایک تصویر نہیں، بلکہ عوام کے دلوں میں موجود گہرے احترام، اعتماد اور قومی وابستگی کی یکتا علامت ہے۔ قوم اپنے محسنوں کو پہچانتی ہے اور ان کی بے مثال قربانیوں کو ہمیشہ قدر کی نگاہ سے دیکھتی ہے۔
پاکستان کی مسلح افواج نے فیلڈ مارشل سید عاصم منیر کی قیادت میں ہر محاذ پر جرات مندانہ اور باوقار مؤقف اختیار کیا ہے۔ افغانستان سے اٹھنے والی دہشت گردی کا بغیر کسی ابہام کے منہ توڑ جواب دیا گیا، جس نے سرحد پار دہشت گرد نیٹ ورکس کو واضح پیغام دیا کہ پاکستان کی سلامتی پر کوئی سمجھوتہ نہیں کیا جائے گا۔ گزشتہ مئی میں بھارت کی جارحانہ روش کو ناکام بنا کر دشمن کو باور کروایا گیا کہ پاکستان اپنی خودمختاری اور سرحدوں کے دفاع کی بھرپور صلاحیت رکھتا ہے۔
آج پاکستان نہ صرف اپنے دفاع میں ناقابلِ تسخیر ہے، بلکہ عالمی امن کی کوششوں میں بھی ایک معتبر کردار کے طور پر ابھر رہا ہے۔ مضبوط قیادت، مستحکم سفارت کاری اور قومی اتحاد “بنیانٌ مرصوص” کی بدولت خطے میں کشیدگی کم کرانے اور مذاکرات کے راستے کھولنے میں پاکستان کا کردار نمایاں رہا ہے۔ خطے میں امن کے لیے کی جانے والی مثبت کوششوں نے ثابت کیا ہے کہ پاکستان طاقت کے ساتھ ساتھ تدبر، ذمہ داری اور وقار کا بھی حامل ہے۔
یہ عزم ظاہر کرتا ہے کہ عوام فیلڈ مارشل سید عاصم منیر کی دل و جان سے قدر کرتے ہیں۔ ان کی ویژنری قیادت کی بدولت پاکستان کی سیاسی و عسکری قیادت ایک پیج پر ہے، جس سے ملک کا نام عالمی سطح پر عزت سے لیا جا رہا ہے۔ یہ سفر یہاں رکنے والا نہیں، بلکہ مضبوط دفاع، مستحکم سفارت کاری اور باوقار پاکستان کی جانب جاری و ساری رہے گا۔