افغان سرزمین کا پاکستان کے خلاف استعمال افسوسناک، مٹھی بھر دہشت گردوں کے سامنے کبھی نہیں جھکیں گے؛ فیلڈ مارشل عاصم منیر

فیلڈ مارشل سید عاصم منیر نے پاکستان ملٹری اکیڈمی کاکول کی پاسنگ آؤٹ پریڈ کا معائنہ کیا اور خطاب کیا۔

آرمی چیف نے کہا کہ پاکستان ملٹری اکیڈمی کی پاسنگ آؤٹ پریڈ کا معائنہ کرنا ان کے لیے باعثِ فخر ہے۔

انہوں نے بنگلہ دیش، عراق، مالی، مالدیپ، نائیجیریا، نیپال، فلسطین، قطر، سری لنکا اور یمن سے تعلق رکھنے والے کیڈٹس کو بھی تربیت مکمل کرنے پر مبارکباد پیش کی۔

افواجِ پاکستان کا قوم کے ساتھ دفاعی عزم

فیلڈ مارشل نے کہا کہ قیامِ پاکستان سے اب تک افواجِ پاکستان نے قوم کی مکمل حمایت کے ساتھ وطن عزیز کے دفاع میں کوئی کسر نہیں چھوڑی۔

انہوں نے کہا کہ حالیہ آپریشن “معرکۂ حق/بنیان مرصوص” میں افواجِ پاکستان نے دشمن کو پیشہ ورانہ مہارت اور عزم کے ساتھ شکست دے کر قوم کا اعتماد مزید مستحکم کیا۔

دشمن کی جارحیت اور پاکستان کی کامیاب جوابی کارروائیاں

آرمی چیف نے کہا کہ ازلی دشمن بھارت کے خلاف کارروائیوں کے دوران پاکستان نے دشمن کے رافیل طیارے مار گرائے اور ایس-400 سسٹم سمیت متعدد بیسز کو نشانہ بنایا۔

انہوں نے کہا کہ پاکستان نے “ملٹی ڈومین وارفیئر” میں اپنی صلاحیتوں کا بھرپور مظاہرہ کیا۔ ان کا کہنا تھا کہ اللہ کے فضل اور قومی عزم سے قوم فولادی دیوار کی مانند دشمن کے سامنے کھڑی رہی۔

بھارت کی الزام تراشی اور پاکستان کا مؤقف

فیلڈ مارشل نے کہا کہ بھارت نے جلد بازی میں الزام تراشی کی اور غیر جانبدارانہ تحقیقات سے گریز کیا۔

انہوں نے کہا کہ بھارت کا خود ساختہ شواہد پیش کرنا اس بات کا ثبوت ہے کہ بھارتی حکومت نے دہشتگردی کو سیاسی مقاصد کے لیے استعمال کیا۔ انہوں نے واضح کیا کہ پاکستان نے ایک بڑے دشمن کے خلاف اپنی واضح فتح کے ذریعے عالمی سطح پر وقار حاصل کیا۔

شہداء، غازیوں اور عوام کو خراجِ تحسین

آرمی چیف نے کہا کہ ہم اپنے شہداء اور ان کے اہلِ خانہ کے بے حد شکر گزار ہیں۔

انہوں نے کہا کہ ہر سپاہی، سیلر، فضائیہ کے جوان، بہادر مرد و خواتین اور بزرگ خراجِ تحسین کے مستحق ہیں۔ انہوں نے نوجوان افسروں کو نصیحت کی کہ وہ شہداء کے وارث ہیں اور اپنی زندگی ان کی یاد کے شایانِ شان گزاریں۔

دفاعی نظریہ اور دشمن کو سخت پیغام

فیلڈ مارشل نے کہا کہ پاکستان کا دفاعی نظریہ “کریڈیبل ڈیٹرنس” اور دائمی تیاری پر مبنی ہے۔ انہوں نے خبردار کیا کہ اگر بھارت نے دوبارہ جارحیت کی کوشش کی تو پاکستان توقع سے زیادہ سخت جواب دے گا۔

انہوں نے کہا کہ پاکستان کے ہتھیار دشمن کی جغرافیائی وسعت کے “جعلی تحفظ” کے تصور کو ختم کر دیں گے۔ ان کا کہنا تھا کہ “نیوکلئیر ماحول میں جنگ کی کوئی گنجائش نہیں، بھارت ہوش کے ناخن لے۔”

عالمی و علاقائی تعلقات

آرمی چیف نے کہا کہ سعودی عرب کے ساتھ حالیہ اسٹریٹجک دفاعی معاہدہ پاکستان اور سعودی بھائی چارے کو مضبوط بناتا ہے۔ انہوں نے کہا کہ پاکستان کو حرمین شریفین کے دفاع میں خدمات پیش کرنا باعثِ عزت ہے۔

فیلڈ مارشل نے کہا کہ ایران کے ساتھ مذاکرات میں بھی پاکستان کا کردار مثبت رہا، جبکہ دیگر مسلم ممالک کے ساتھ تعلقات تیزی سے فروغ پا رہے ہیں۔ انہوں نے چین کے ساتھ تاریخی شراکت داری اور امریکہ کے ساتھ تعلقات کے احیاء کو خوش آئند قرار دیا۔

انہوں نے صدر ٹرمپ کی امن کوششوں اور اسٹریٹجک لیڈرشپ کی بھی تعریف کی۔

افغانستان، دہشتگردی اور پراکسی جنگ

فیلڈ مارشل نے کہا کہ بھارت ریاستی سرپرستی میں دہشتگردی کو بطور پالیسی جاری رکھے ہوئے ہے۔

انہوں نے کہا کہ بھارت کا “فتنہ الہند” اور “فتنہ الخوارج” کو بطور “کرائے کے قاتل” استعمال کرنا اس کا منافقانہ چہرہ ظاہر کرتا ہے۔ انہوں نے خبردار کیا کہ افغان طالبان ریجیم کو اپنی سرزمین پر موجود پراکسیوں پر قابو پانا ہوگا۔
انہوں نے کہا کہ پاکستان کے بہادر عوام، خاص طور پر خیبرپختونخوا اور بلوچستان کے عوام کے تعاون سے دہشتگردی کا خاتمہ یقینی بنایا جائے گا۔

کشمیر اور فلسطین پر واضح مؤقف

فیلڈ مارشل نے کہا کہ بھارت کے غیر قانونی قبضے میں جموں و کشمیر کے عوام ظلم و جبر کا شکار ہیں۔

انہوں نے کہا کہ پاکستان اقوام متحدہ کی قراردادوں اور کشمیری عوام کی امنگوں کے مطابق جدوجہدِ آزادی کی حمایت جاری رکھے گا۔ انہوں نے فلسطین کے مسئلے پر کہا کہ دنیا نے بالآخر اسرائیلی جارحیت کا نوٹس لیا ہے۔

انہوں نے کہا کہ پاکستان دو ریاستی حل پر قائم ہے اور القدس کو دارالحکومت بنا کر آزاد فلسطینی ریاست کا حامی ہے۔

قوم، میڈیا اور نوجوانوں کے لیے پیغام

فیلڈ مارشل نے کہا کہ ہمارا سفر ابھی مکمل نہیں ہوا، دشمن آج بھی بے چین ہے لیکن ہمارا عزم مضبوط ہے۔

انہوں نے سورۃ الصف کی آیت 4 کا حوالہ دیتے ہوئے کہا کہ “اللہ ان لوگوں کو پسند کرتا ہے جو اس کی راہ میں صف باندھ کر لڑتے ہیں گویا وہ سیسہ پلائی دیوار ہیں”۔

انہوں نے قائداعظم کے 1948 کے بیان کا حوالہ دیتے ہوئے کہا: “ہمیں ریاست کے لیے قربانی اور خدمت کرنی ہے تاکہ پاکستان دنیا کی سب سے خودمختار ریاست بنے۔” انہوں نے نوجوان افسروں کو تلقین کی کہ پیشہ ورانہ مہارت، نظم و ضبط اور اخلاقی قیادت کو اپنی پہچان بنائیں۔

قوم کے نام پیغام

فیلڈ مارشل نے کہا کہ پاکستان کا پرچم ہمیشہ بلند رہے گا کیونکہ اس کے محافظ ناکام نہیں ہوتے۔

انہوں نے کہا کہ “پاکستان کی بڑھتی ہوئی صلاحیت کے ساتھ ہمیں تمام چیلنجز کا حوصلے اور ایمان کے ساتھ مقابلہ کرنا ہوگا۔”

آخر میں آرمی چیف نے تمام کیڈٹس کو کمیشن حاصل کرنے پر مبارکباد پیش کی اور دعا کی کہ اللہ تعالیٰ پاکستان کی حفاظت فرمائے۔

دیکھیں: خیبر پختونخوا میں مزید افغان مہاجر کیمپ بند، تعداد 42 ہوگئی