افغان طالبان کے جنرل ڈائریکٹوریٹ آف انٹیلی جنس (جی ڈی آئی) کے ایک سینئر اہلکار اور ادارے کے سربراہ عبد الحق واثق کے قریبی معاون مولوی نعمان غزنوی کابل میں ہلاک ہو گئے ہیں۔ طالبان سے وابستہ متعدد ذرائع اور سوشل میڈیا اکاؤنٹس نے ان کی ہلاکت کی تصدیق کی ہے، تاہم تاحال طالبان حکام کی جانب سے اس واقعے پر کوئی باضابطہ بیان جاری نہیں کیا گیا۔
ذرائع کے مطابق مولوی نعمان غزنوی کابل کے مشرقی علاقے بٹخاک میں واقع اپنی رہائش گاہ پر ہلاک ہوئے۔ وہ طالبان انٹیلی جنس کے سربراہ عبد الحق واثق کے نہایت قریبی ساتھی اور سیکریٹری کے طور پر کام کر رہے تھے۔ واقعے کی نوعیت اور اسباب تاحال واضح نہیں ہو سکے۔
طالبان سے منسلک بعض ذرائع کا دعویٰ ہے کہ یہ واقعہ گیس دھماکے کے نتیجے میں پیش آیا، تاہم دیگر ذرائع اس مؤقف کو مسترد کرتے ہوئے کہتے ہیں کہ ہلاکت طالبان کے اندرونی اختلافات اور ادارے کے اندر جاری اقتدار کی کشمکش سے جڑی ہو سکتی ہے۔
سوشل میڈیا پر گردش کرنے والی بعض غیر مصدقہ اطلاعات میں یہ الزام بھی عائد کیا جا رہا ہے کہ مولوی نعمان کو طالبان انٹیلی جنس کے اندرونی تنازع کے دوران تاج میر جواد کے احکامات پر قتل کیا گیا۔ تاہم ان دعوؤں کی تاحال آزادانہ تصدیق نہیں ہو سکی ہے اور نہ ہی طالبان حکام نے ان الزامات پر کوئی ردعمل دیا ہے۔
رپورٹس کے مطابق اس واقعے میں مولوی نعمان کے علاوہ دو دیگر افراد بھی ہلاک ہوئے ہیں، تاہم ان کی شناخت اور واقعے سے تعلق کے حوالے سے تفصیلات سامنے نہیں آ سکیں۔
طالبان حکام کی خاموشی کے باعث واقعے کے پس منظر اور محرکات کے حوالے سے قیاس آرائیاں جاری ہیں، جبکہ اب تک کسی بھی گروہ نے اس واقعے کی ذمہ داری قبول نہیں کی۔ مزید تفصیلات سامنے آنے کا انتظار کیا جا رہا ہے۔
دیکھیں: افغانستان سے لیبیا تک: پاکستان کی علاقائی حکمتِ عملی