پشاور میں ہنگو میں خوارج کے ساتھ فائرنگ کے تبادلے میں شہید ہونے والے پاک فوج کے 6 اہلکاروں کی نماز جنازہ ادا کر دی گئی۔
آئی ایس پی آر کے مطابق نماز جنازہ میں وفاقی وزیر داخلہ محسن نقوی، گورنر خیبرپختونخوا فیصل کریم کنڈی، کور کمانڈر پشاور، شہدا کے لواحقین اور سینئر سول و عسکری حکام نے شرکت کی۔
شہدا میں 2 افسران بھی شامل
آئی ایس پی آر کے مطابق شہدا میں کیپٹن ابوذر فاروق، لیفٹیننٹ شیراز بابر، سپاہی شکیل احمد، سپاہی حمزہ، سپاہی محمد عثمان عزیز اور نان کمبیٹنٹ غلام سجاد شامل ہیں۔
کیپٹن ابوذر فاروق کی عمر 23 سال اور تعلق ضلع گوجرانوالہ سے تھا۔ لیفٹیننٹ شیراز بابر کی عمر 22 سال اور تعلق ضلع چکوال سے تھا۔ دونوں افسران فائرنگ کے دوران اپنے دستوں کی قیادت کر رہے تھے۔
شہدا کے جسد خاکی آبائی علاقوں کو روانہ
نماز جنازہ کے بعد شہدا کے جسد خاکی آبائی علاقوں کو روانہ کر دیے گئے۔ انہیں مکمل فوجی اعزاز کے ساتھ سپرد خاک کیا جائے گا۔
یاد رہے کہ 20 ستمبر کو ہنگو میں سکیورٹی فورسز کے قافلے اور خوارج کے درمیان فائرنگ کا تبادلہ ہوا تھا۔ آئی ایس پی آر کے مطابق کارروائی میں 8 خوارج ہلاک جبکہ 2 افسران سمیت 6 اہلکار شہید ہوئے تھے۔ علاقے میں ممکنہ طور پر موجود دیگر خوارج کے خاتمے کے لیے کلیئرنس آپریشن بھی جاری رہا۔
دیکھیے: ہنگو: سیکیورٹی فورسز نے بھارتی حمایت یافتہ 8 دہشتگرد ہلاک کردیے، 2 افسران سمیت 6 جوان شہید