مقبوضہ مغربی کنارے کے شہر الخلیل میں فائرنگ کے تبادلے میں 2 اسرائیلی فوجی ہلاک اور 3 زخمی ہوگئے، اسرائیلی فوج نے دونوں فلسطینی حملہ آوروں کو بھی ہلاک کرنے کا دعویٰ کیا ہے۔
اسرائیلی میڈیا کے مطابق فائرنگ کا تبادلہ 20 منٹ سے زائد جاری رہا۔ ہلاک ہونے والے اسرائیلی فوجیوں کی شناخت 23 سالہ اسٹاف سارجنٹ رون یوناتن روئٹمین اور 20 سالہ سارجنٹ یوول شائی سویلم کے نام سے ہوئی ہے۔
حملے کی تفصیلات
اسرائیلی فوج کی ابتدائی تحقیقات کے مطابق دونوں مسلح افراد روٹ 35 پر اسرائیلی شہریوں کو نشانہ بنانے کی منصوبہ بندی کررہے تھے۔ تاہم، جب انہیں محسوس ہوا کہ وہ مرکزی شاہراہ تک نہیں پہنچ سکیں گے تو انہوں نے ایک عارضی چیک پوسٹ پر فائرنگ کردی۔
اسرائیلی میڈیا کے مطابق حملہ آوروں کی شناخت محمد جعابہ اور فراس جعابہ کے نام سے ہوئی ہے۔ دونوں کا تعلق الخلیل سے تھا اور ان کی عمریں 27 سال بتائی گئی ہیں۔
نیتن یاہو کی محلہ تباہ کرنے کی دھمکی
واقعے کے بعد اسرائیلی وزیراعظم بن یامین نیتن یاہو نے وزیر دفاع اسرائیل کاٹز کے ہمراہ الخلیل کا دورہ کیا۔ اس موقع پر انہوں نے حملہ آوروں کے محلے کو تباہ کرنے کی دھمکی دی۔
نیتن یاہو کے مطابق اسرائیل اس محلے میں کارروائی کرے گا، مکینوں کو وہاں سے نکالا جائے گا، گھر گھر تلاشی لی جائے گی اور ہتھیاروں سمیت مبینہ دہشت گردانہ ڈھانچے کو ختم کیا جائے گا۔
اسرائیلی وزیراعظم نے یہ بھی کہا کہ مغربی کنارے میں سڑکوں کے کنارے اجازت کے بغیر تعمیر کیے گئے گھروں کو مسمار کیا جائے گا، کیونکہ ان کے بقول یہ عمارتیں اسرائیلی افواج کے لیے خطرہ ہیں۔
نیتن یاہو نے دعویٰ کیا کہ اسرائیلی فوج مغربی کنارے میں 1967 کے بعد سب سے بڑے فوجی آپریشن کی تیاری کررہی ہے۔
