امریکی سینٹرل کمانڈ (سینٹکام) نے ایران کے فوجی اہداف کے خلاف تازہ فضائی حملوں کا ایک مرحلہ مکمل کرنے کا اعلان کیا ہے۔
سینٹکام کے مطابق امریکی افواج نے کارروائی کے دوران پاسدارانِ انقلاب سے متعلق متعدد اہم اہداف کو نشانہ بنایا۔ ان اہداف میں فضائی دفاعی تنصیبات، ریڈار سسٹمز، بحری اثاثے اور مختلف فوجی مراکز شامل ہیں۔
امریکی فوج کے مطابق بارودی سرنگیں بچھانے کی صلاحیت رکھنے والے نظاموں اور مواصلاتی مراکز کو بھی حملوں کا نشانہ بنایا گیا۔
سینٹکام کا کہنا ہے کہ یہ کارروائیاں امریکی فوجی اہلکاروں کے خلاف حالیہ کارروائیوں کے جواب میں کی گئیں۔ امریکی حکام کے مطابق آبنائے ہرمز میں تجارتی جہازوں پر مبینہ حملوں کی کوششوں اور امریکی اہلکاروں کو نشانہ بنانے کی پاسدارانِ انقلاب کی حالیہ کوششوں کے بعد یہ حملے کیے گئے۔
امریکی سینٹرل کمانڈ نے بتایا کہ اس وقت مشرق وسطیٰ میں 50 ہزار سے زائد امریکی فوجی اہلکار تعینات ہیں۔ یہ اہلکار خطے کی صورتحال پر کڑی نظر رکھے ہوئے ہیں۔
سینٹکام کے مطابق امریکی افواج صدر کے احکامات کے تحت مزید فوجی کارروائیوں کے لیے بھی مکمل طور پر تیار ہیں۔
دیکھیے: ٹرمپ کی اردن میں کارروائی کے جواب میں ایران پر شدید حملوں کی دھمکی
