اسلام آباد: ایران نے جمعرات کی شام امریکہ کے ساتھ جنگ بندی مذاکرات کے حوالے سے اپنا نیا مذاکراتی مسودہ پاکستان کے حوالے کر دیا ہے۔ ایرانی خبر رساں ایجنسی کے مطابق، ایران نے جمعرات کی شام 30 اپریل کو اپنا نیا مذاکراتی مسودہ پاکستان کو پیش کیا۔ اس موقع پر ایران نے واضح کیا ہے کہ پاکستان ہی امریکہ کے ساتھ ہونے والے مذاکرات میں ایران کا واحد سرکاری ثالث رہے گا۔
ایران کی وزارت خارجہ کے ترجمان اسماعیل بقائی نے گزشتہ شام ایک ٹیلی وژن انٹرویو میں گفتگو کرتے ہوئے اس عزم کا اعادہ کیا کہ جنگ کا خاتمہ اور پائیدار امن امریکہ کے ساتھ مذاکرات میں تہران کی اولین ترجیح ہے۔
سفارتی ذرائع کے مطابق، پاکستان دونوں ممالک کے درمیان ثالث کا کردار ادا کر رہا ہے اور خطے میں امن کے قیام کے لیے ان مذاکرات کو انتہائی اہمیت حاصل ہے۔ ایران نے پاکستان پر مکمل اعتماد کا اظہار کرتے ہوئے اسے امریکہ کے ساتھ رابطوں اور مذاکرات کے لیے واحد سرکاری چینل اور ثالث کے طور پر تسلیم کیا ہے۔
دیکھئیے:اسرائیلی فوج کا گلوبل صمود فلوٹیلا پر چھاپہ، متعدد کشتیاں قبضے میں لے لیں