نائب وزیر اعظم و وزیر خارجہ اسحاق ڈار نے کہا ہے کہ افغانستان سے دہشت گردی کا خطرہ علاقائی امن اور معاشی ترقی کو بری طرح متاثر کر رہا ہے۔
انہوں نے واضح کیا کہ افغان عبوری حکومت پاکستان کے جائز سکیورٹی خدشات کو دور کرے۔ طالبان حکومت کالعدم ٹی ٹی پی، بی ایل اے اور دیگر گروہوں کے خلاف ٹھوس اور قابلِ تصدیق اقدامات کرے۔
ای سی او کونسل کے غیر رسمی اجلاس سے خطاب میں انہوں نے کہا کہ پاکستان ایک پرامن، خوشحال اور مستحکم افغانستان کا خواہاں ہے۔ پاکستان ہمیشہ ہمسایہ ممالک کے ساتھ پرامن بقائے باہمی پر یقین رکھتا ہے۔
افغان حکومت سے مطالبات
اسحاق ڈار نے کہا کہ پاکستان نے افغانستان سے رابطوں اور ٹرانزٹ تجارت میں مسلسل سہولتیں فراہم کی ہیں۔ پاکستان کی واحد توقع یہ ہے کہ اس کی سلامتی کے خلاف کوئی کارروائی نہ ہو۔
ان کا کہنا تھا کہ دہشت گرد تنظیمیں پاکستان کی خودمختاری اور شہریوں کی زندگیوں کے لیے سنگین خطرہ ہیں۔ اس خطرے کے خاتمے کے بغیر خطے کا امن اور استحکام ممکن نہیں۔
نائب وزیر اعظم نے ای سی او کی تجارتی صلاحیت پر بات کرتے ہوئے کہا کہ یہ خطہ 80 لاکھ مربع کلومیٹر اور 50 کروڑ آبادی پر مشتمل ہے۔ اس وسعت کے باوجود عالمی تجارت میں خطے کا حصہ صرف 2.2 فیصد ہے۔
انہوں نے کہا کہ رکن ممالک کے مابین تجارت اور معاشی تعاون کے فروغ کی وسیع گنجائش موجود ہے۔ وسطی اور جنوبی ایشیا کو ملانے والے منصوبے خطے کی معیشت کو نئی طاقت بخش سکتے ہیں۔
مستقبل کا وژن
اسحاق ڈار نے کہا کہ پاکستان خطے کیلیے تجارتی گیٹ وے بننے کو تیار ہے۔ پاکستان وسطی ایشیا کو بحیرہ عرب کی بندرگاہوں سے جوڑنے میں کلیدی کردار ادا کر سکتا ہے۔
انہوں نے ویزا نظام میں آسانی، تجارتی راستوں کی بحالی اور ڈیجیٹل انضمام پر زور دیا۔ ان کا کہنا تھا کہ ای سی او کے نئے اسٹریٹجک اہداف علاقائی خوشحالی کی بنیاد بنیں گے۔
انہوں نے یاد دلایا کہ پاکستان نومبر میں اسلام آباد کے اندر ای سی او کونسل کے 30ویں اجلاس کی میزبانی کیلیے پوری طرح تیار ہے۔ پاکستان تمام رکن ممالک کے ساتھ قریبی شراکت داری کا خواہاں ہے۔
